ՌԴ նախագահի խոսնակ Դմիտրի Պեսկովը հաստատել է տեղեկությունը, որ հուլիսի 19-ին ՌԴ նախագահ Պուտինը Թուրքիայի նախագահ Էրդողանի հետ միաժամանակ կգտնվի Թեհրանում, որտեղ տեղի կունենա Աստանայի ձևաչափի եռակողմ հանդիպում՝ Պուտին-Էրդողան-Ռայիսի: Նախօրեին՝ հուլիսի 11-ին, տեղի է ունեցել Պուտինի և Էրդողանի հեռախոսազրույցը, որի վերաբերյալ Կրեմլի տարածած հաղորդագրության մեջ ազդարարվում էր Պուտինի և Էրդողանի առաջիկա հանդիպման մասին, թեև առանց նշելու օր և վայր: Նույն հեռախոսազրույցում, դարձյալ ըստ Կրեմլի, Պուտինն Էրդողանին հայտնել էր Սիրիայի հետ կապված հարցերը Աստանայի եռակողմ ձևաչափով քննարկումների միջոցով լուծելու կարևորության մասին: Այդ դիտարկումն ուշադրության է արժանի տեղեկությունների համատեքստում, թե Էրդողանը Սիրիայի ուղղությամբ ռազմարշավ իրականացնելու և իր ազդարարած 30-կմ անվտանգության բուֆերային գոտի ձևավորելու օպերացիայի հարցը լուծել է ՆԱՏՕ մադրիդյան Վեհաժողովի շրջանակում, այդ թվում Ջո Բայդենի հետ հանդիպմանը՝ ստանալով այդ օպերացիան սկսելու կանաչ լույս ԱՄՆ-ից:
Արդյո՞ք դրա համար չէ, որ Պուտինը հիշեցրել է Էրդողանին Աստանայի ձևաչափը: Էրդողանի արձագանքը անորոշ է, թեև անկասկած է, որ նա իր վերջին տարիների քաղաքականությանը հավատարիմ, փորձելու է հաջող առևտուր անել բոլոր հնարավոր ուղղություններով: Այդ համատեքստում է անհրաժեշտ դիտարկել նաև նրա քայլը Հայաստանի վարչապետի հետ հեռախոսազրույցի տեսքով, որ Թուրքիայի նախագահը դարձյալ՝ ձգտելու է հարմար պայմաններով իրացնել թե Նահանգների, թե Ռուսաստանի հետ հարաբերությունում, և թերևս նաև Իրանում, որի անվտանգության խորհրդի քարտուղարը օրերս գտնվում էր Հայաստանում և անկասկած հետաքրքրված էր նաև հայ-թուրքական շփումների հարցում արձանագրված առաջին կոնկրետ պայմանավորվածություններով: Ուշագրավ է այն, որ Էրդողանն ու Պուտինը գրեթե միաժամանակ ուղղություն են վերցնում դեպի Թեհրան այն շրջագայությանը զուգահեռ, որ ԱՄՆ նախագահ Բայդենը հուլիսի 13-ին կիրականացնի մերձավորարևելյան ուղղությամբ՝ Իսրայել, Պաղեստինի ինքնավարություն, Սաուդյան Արաբիա:
