Ադրբեջանցի հայտնի քաղաքագետներ Հիքմեթ Հաջիզադեն ու Վաֆա Գուլուզադեն Բաքվի «Ազադլըղ» թերթին տված հարցազրույցի ժամանակ հայտարարել են, որ Ադրբեջանի պետականության հիմնական սպառնալիքն այսօր բխում է Իրանից ու Ռուսաստանից։ Ըստ նրանց՝ Ադրբեջանի անվտանգության երաշխիք կարող է հանդիսանալ միայն Թուրքիայի հետ ռազմական դաշինքը, հետագայում նաև թուրք-ադրբեջանական կոնֆեդերատիվ պետության ստեղծումը։
«Ռեգիոն» հետազոտական կենտրոնի կազմակերպած առցանց հարցազրույցի ընթացքում պատասխանելով «Առաջին լրատվականի» հարցին, թե ինչքանով է հավանական այդ համադաշնության ստեղծումը, «Հանրապետական այլընտրանք» շարժման համանախագահ Իլգար Մամեդովը նշեց, որ համաձայն է իր գործընկերների գնահատականների հետ. «Բայց այլ հարց է, թե այդ գնահատականներից ելնելով ինչ քաղաքական քայլեր են անհրաժեշտ և հնարավոր նախաձեռնել»:
Մամեդովը նշեց, որ Թուրքիան ՆԱՏՕ-ի անդամ է, և առավել հավանական է, որ նրա պարտավորությունները ՆԱՏՕ-ի շրջանակներում կգերակայեն Բաքվի և Անկարայի ցանկացած միության շրջանակներում ձեռք բերված պարտավորություններին: Այդուամենայնիվ, ըստ ադրբեջանցի քաղաքագետի, կոնֆլիկտի առաջացման պարագայում անգամ ՆԱՏՕ-Թուրքիա համակարգված հարաբերությունների ընթացքը դժվար է կանխատեսել. «Այս ամենից ելնելով, հույս ունեմ, որ ադրբեջանցի քաղաքագետների գնահատականները և առաջարկված ուղիները կօգնեն Ադրբեջանի իշխանություններին ավելի լավ ծրագրել արտաքին քաղաքականությունը»:
