Տնտեսական մրցակցության պաշտպանության պետական հանձնաժողովի մամուլի քարտուղար Գայանե Սահակյանն այսօր մեզ հետ զրույցում, անդրադառնալով շաքարավազի գնի բարձրացմանը, տեղեկացրեց, որ հանձնաժողովը մշտական գնային մոնիթորինգի արդյունքում արձանագրել է, որ շաքարավազի գինը կտրուկ աճել է՝ հասնելով 430 դրամի:
Այդ առնչությամբ շուկայի գերիշխողից «Սալեքս Գրիգ» ընկերությունից, որը իրացման ծավալներով շուկայում զբաղեցնում է 99.9 տոկոսը, հանձնաժողովը թանկացման վերաբերյալ փաստաթղթային հիմնավորում է պահանջել: Հիշեցենք, որ «Սալեքս Գրիգը» պատկանում է խոշոր գործարար, ԱԺ պատգամավոր Սամվել Ալեքսանյանին:
«Այսինքն, թե որ երկրից է ինքը գնել շաքարավազը, ինչ գնով, և վերջապես՝ ինչ գնով է իրացրել խանութներին: Հիմնավորումներ են պահանջվել նաև սուպերմարկետներից, որպեսզի տեսանելի լինի, թե գնաճը կոնկրետ ո՞ր օղակում է տեղի ունեցել: Այսինքն սուպերմարկետները ևս մեզ պետք է տեղեկացնեն, թե ինչ գնով են գնել շաքարավազը վերջին մեկ շաբաթվա ընթացքում: Այս դեպքում արդեն տեսանելի կլինի, թե որ օղակում է գնաճը տեղի ունեցել:
Երբ հանձնաժողովը ստանա այս փաստաթղթերը, տեղի կունենա համապատասխան վերլուծություն: Միջազգային գները ևս հանձնաժողովի ուշադրության կենտրոնում են, և արդեն կփորձենք համադրել:
Նրանք ժամկետները պետք է տրամադրեն 10-օրյա ժամկետներում, իսկ ուսումնասիրությունները հանձնաժողովի կողմից պետք է իրականացվեն 3-ամսյա ժամկետում: Բայց հաշվի առնելով խնդրի կարևորությունը՝ բնականաբար, մենք հնարավորինս արագ կանցկացնենք ուսումնասիրությունը»,- ավելացրեց Գայանե Սահակյանը:
