ՀՀ կենտրոնական բանկը տարադրամի արտահոսքի ռիսկի հետ կապված իր կողմից սահմանափակումների կարիք չի տեսնում, այս պահին խնդիր չկա: Այս մասին ասաց ԿԲ նախագահ Մարտին Գալստյանն ասուլիսում՝ անդրադառնալով հարցին, թե արդյոք տարադրամի արտահոսքի վտանգ կա այս պահին, եթե այո, ապա կանխելու համար ԿԲ-ն կարո՞ղ է որոշակի սահմանափակումներ մտցնել՝ տարադրամի ձեռքբերման նկատմամբ:
«Ինչ վերաբերում է տարադրամի արտահոսքի հետ կապված սահմանափակումներին, կարծում եմ, որ այս փուլում խնդիր չկա, դրա կարիքը չկա»,-ասաց Գալստյանը:
ԿԲ նախագահը նշեց՝ գիտի, որ կան երկրներ, որոնք կանխիկ տարադրամի արտահոսքի վրա որոշակի սահմանափակումներ են կիրառում:
«Բանկային համակարգի գործընկերների կողմից որոշակի լուծումներ այդ հարցի կապակցությամբ տրվել են: Բայց այս պահի դրությամբ անհրաժեշտությունը չեմ տեսնում, որ ԿԲ-ն ինչ-որ դիրեկտիվով կարգավորի այդ իրավիճակը»,-եզրափակեց Գալստյանը: