Կրեմլի մամուլի ծառայությունը մանրամասներ է հայտնել ՌԴ նախագահ Վլադիմիր Պուտինի, Գերմանիայի կանցլեր Օլաֆ Շոլցի եւ Ֆրանսիայի նախագահ Էմանուել Մակրոնի հեռախոսազրույցի մասին։ Հաղորդագրության մեջ մասնավորապես ասվում է, որ «Դոնբասի պաշտպանության հատուկ ռազմական գործողության տարածքներում հումանիտար իրավիճակի վերաբերյալ զրուցակիցների բարձրացրած հարցերի կապակցությամբ Վլադիմիր Պուտինը տեղեկացրել է իրերի իրական վիճակի մասին։ Մասնավորապես, բերվել են Ուկրաինայի ուժայինների կողմից միջազգային մարդասիրական իրավունքի նորմերի կոպիտ խախտման բազմաթիվ փաստեր՝ ոչ դատական հաշվեհարդարներ այլախոհների նկատմամբ, պատանդներ վերցնել եւ քաղաքացիական անձանց որպես կենդանի վահան օգտագործել, բնակելի թաղամասերում, հիվանդանոցների, դպրոցների, մանկապարտեզների մոտ եւ նման այլ վայրերում ծանր զենք տեղադրել… Միաժամանակ, ազգայնական գումարտակները սիստեմատիկ կերպով խափանում են բնակչությանը փրկելու աշխատանքները եւ տարհանվելիս վախեցնում են խաղաղ քաղաքացիներին», ասվում է հաղորդագրության մեջ։
Պուտինի՝ իրականությունից կտրվածությունը եւ Ուկրաինայի վրա սեւեռվածությունը (Կրեմլի հաղորդագրության մեջբերված այս հատվածը դրա վկայությունն է) նշում են բոլորը, այդ թվում Շոլցն ու Մակրոնը, արձանագրելով, որ Ռուսաստանը պատերազմ է վարում Ուկրաինայի դեմ եւ ագրեսոր է։ Թե ինչու են Շոլցն ու Մակրոնը պարբերաբար զանգում Պուտինին՝ նրանից պարբերաբար նման պատմություններ լսելով, դժվար է ասել։
