ՀՀ տրանսպորտի և կապի նախարար Մանուկ Վարդանյանի մասնակցությամբ այսօր մարվեց և շրջանառության մեջ դրվեց Համահայկական հինգերորդ խաղերին նվիրված գեղաթերթիկը:
Մարման պաշտոնական արարողությանը մասնակցում էին նաև Համահայկական հինգերորդ խաղերի համաշխարհային կոմիտեի, «Հայփոստ» ընկերության ներկայացուցիչները, անվանի սպորտսմեններ, Հայաստանի ֆիլատելիստների միության անդամներ:
Նախարար Մ. Վարդանյանը, կարևորելով նամականիշների թողարկումը, նշեց, որ դրանք պատմական և նյութական արժեք լինելուց բացի՝ յուրահատուկ հանրագիտարան են նշանավոր մարդկանց, իրադարձությունների, մշակույթի, բնաշխարհի մասին: Նախարարի խոսքով՝ սպորտային թեմաներով նամականիշները միշտ եղել են ուշադրության կենտրոնում և իրենց տեղը գտել նամականիշների թողարկումներում:
Նշենք, որ Համահայկական խաղերին նվիրված առաջին գեղաթերթիկը շրջանառության մեջ է դրվել 1999 թ.` Համահայկական առաջին խաղերի ժամանակ, այնուհետև նույն թեմաներով նամականիշեր և գեղաթերթիկներ թողարկվել են մյուս խաղերի ընթացքում` 2001, 2003 և 2007 թվականներին: