Грузия Online-ի փոխանցմամբ՝ Թբիլիսիի քաղաքային դատարանը մեղավոր է ճանաչել Վրաստանի սահմանապահ ոստիկանության նախկին պետ, վրացական ընդդիմության առաջնորդներից Նինո Բուրջանաձեի ամուսին Բադրի Բիցաձեին՝ նրան հեռակա կարգով դատապարտելով 5 տարի 6 ամսվա ազատազրկման։
Բիցաձեն մեղավոր է ճանաչվել 353-րդ հոդվածի 2-րդ կետով (խմբի կողմից ցուցաբերված դիմադրություն, հասարակական կարգը պահպանողների և իշխանական այլ ներկայացուցիչների վրա բռնության գործադրում կամ սպառնալիք)։
Բիցաձեն կարող է մեկ ամսվա ընթացքում այդ դատավճիռը բողոքարկել վերաքննիչ դատարանում։ Նրա պաշտպանը հայտարարել է, որ անկասկած այդպես էլ լինելու է։
Բիցաձեի դատավճռի իրագործումը սկսելու է նրա ձերբակալության կամ Վրաստանի իրավապահ մարմիններին նրա հանձնվելուց հետո։
Հիշեցնենք, որ ավելի վաղ նշվում էր, որ ոստիկանների վրա խմբակային հարձակում կազմակերպելու մեջ մեղադրվող Բիցաձեն կարող է դատապարտվել 4-7 տարվա ազատազրկման։
