Թուրքիայի նախագահի խոսնակ Իբրահիմ Քալընը նշել է, որ Մոսկվային և Կիևին անհրաժեշտ է ժամանակավոր համաձայնություն՝ մինչև ճգնաժամի վերջնական լուծումը:
Այս մասին, հայտնում է թուրքական «Անադոլու» լրատվական գործակալությունը:
«Կարծում եմ, որ կարևոր է փորձել գտնել ինչ-որ մոդուս վիվենդի (ժամանակավոր կամ նախնական միջազգային պայմանագիր, որը կնքվել է ապագայում դրա վերջնական կարգավորման ակնկալիքով–խմբ.) և դա անել ողջամտորեն, համբերատար»,- ասել է Թուրքիայի ղեկավարի խոսնակը։
Թուրքիայի նախագահ Ռեջեփ Թայիփ Էրդողանը Ռուսաստանի Դաշնության նախագահ Վլադիմիր Պուտինին և Ուկրաինայի նախագահ Վլադիմիր Զելենսկուն հրավիրել է Թուրքիա՝ երկու երկրների միջև առկա տարաձայնությունները հարթելու:
Այս մասին չորեքշաբթի հայտարարել է Թուրքիայի ղեկավարի խոսնակ Իբրահիմ Քալընը։
«Թուրքիան պատրաստ է ցանկացած դեր խաղալ Ռուսաստանի Դաշնության և Ուկրաինայի միջև լարվածությունը նվազեցնելու համար։ Նախագահ Էրդողանը բանակցություններ է վարում և՛ ՌԴ նախագահ Վլադիմիր Պուտինի, և՛ Ուկրաինայի նախագահ Վլադիմիր Զելենսկու հետ։ Փաստորեն, նա երկուսին էլ հրավիրել է Թուրքիա, եթե ցանկանում են հանդիպել և հարթել խնդիրներն ու տարաձայնությունները»,- նրա խոսքերն է մեջբերում Sabah-ը։
Բացի այդ, Քալընն ասել է, որ Էրդողանը առաջիկա մի քանի շաբաթների ընթացքում կմեկնի Ուկրաինա՝ Զելենսկու հետ բանակցությունների նպատակով։
