Շոկերից հետո Հայաստանում բանկային համակարգը որոշակի զգուշավորություն է ցուցաբերում վարկ տալուց, սակայն վարկերի պորտֆելն աճում է Կենտրոնական բանկի սպասումների շրջանակում, անգամ՝ սպասվածից մի փոքր ավել: Այս մասին ասաց ԿԲ մակրոտնտեսական դեպարտամենտի տնօրեն Արմեն Նուրբեկյանը՝ անդրադառնալով վարկավորմանը:
Նուրբեկյանը նախ նշեց, որ անշարժ գույքի շուկայում գործարքների քանակը սեպտեմբերին եղել է բոլոր ժամանակների բարձր մակարդակներից մեկում: «Դա նշանակում է, որ մենք ունենք բավականին բարձր ակտիվություն, ինչը արտահայտում է նույն միտումը, որ հիփոթեքային պորտֆելը բավականին արագ աճում է»,-ասաց Նուրբեկյանն ու նշեց պետական ծրագրի մասին:
Իսկ ինչ վերաբերում է վարկավորման աճի այլ մասերին՝ ԿԲ մակրոտնտեսական դեպարտամենտի տնօրենն ասաց, որ վարկավորման ընդհանուր պորտֆելի աճը գնում է իրենց բազային սցենարի համաձայն: «Անցյալ տարվանից ասում ենք, որ բնականաբար մեծ շոկերից հետո բանկային համակարգը որոշակի զգուշավորություն է ցուցաբերում վարկ տալուց: Հետևաբար, եթե հանում ենք կառավարության կոնկրետ ծրագիրը, որը հիփոթեքային շուկայի վրա է էական ազդեցություն ունենում, ապա մնացած մասը ըստ էության մի քիչ ավելի դրական է, քան մենք սպասում էինք»,-հավելեց Նուրբեկյանը:
Նա հավելեց, որ վարկավորման պորտֆելի աճը ընդհանուր առմամբ արտահայտում է ԿԲ սպասումների միտումը:
