TRT-ի ռուսական ծառայության փոխանցմամբ՝ ԱՄՆ պետքարտուղար Հիլարի Քլինթոնը երեկ հեռախոսազրույց է ունեցել Թուրքիայի արտգործնախարար Ահմեդ Դավութօղլուի հետ։
Հեռախոսազրույցի ժամանակ կողմերը գլխավորապես քննարկել են Սիրիայում տիրող իրավիճակը։ Նրանք գնահատական են տվել սիրիական վերջին զարգացումներին՝ դատապարտելով սիրիական բանակի գործադրած բռնություններն ու այդ կապակցությամբ սիրիական ղեկավարության որդեգրած դիրքորոշումը։ Քլինթոնն ու Դավութօղլուն քննարկել են նաև տարածաշրջանային խնդիրներ։
Իսկ այսօր Դավութօղլուն Էսքիշեհիրում, պատասխանելով լրագրողների՝ Սիրիային առնչվող հարցերին, հայտարարել է, որ իրենք ցանկանում են, որպեսզի անհապաղ կյանքի կոչվեն այն հարցերը, որոնց շուրջ նա պայմանավորվածություն է ձեռք բերել Դամասկոսում՝ Սիրիայի նախագահ Բաշար Ալ-Ասադի հետ հանդիպման ժամանակ.
«Առաջին օրերին կատարվեցին մի շարք դրական քայլեր։ Օրինակ՝ Համայից դուրս բերվեցին տանկերը, մեր լրագրողներին թույլ տրվեց այցելել այդ քաղաք։ Սակայն հետագայում՝ ուրբաթ օրվանից, դժբախտաբար, շարունակվեցին ռազմական գործողությունները։
Դրանց ընթացքում զոհվել են մեծ թվով խաղաղ բնակիչներ։ Դա անթույլատրելի է։ Մենք պահանջել և պահանջում ենք ռազմական գործողությունների անհապաղ դադարեցում։ Մենք սիրիական ղեկավարությանը կոչ ենք անում մեծ համբերատարություն դրսևորել սեփական ժողովրդի հանդեպ և չմեծացնել լարվածությունը։ Մարդկանց կորուստների կանխումն ավելի անհրաժեշտ է դառնում մուսուլմանների համար սուրբ Ռամադան ամսին»։
Դավութօղլուն հայտարարել է, որ առաջիկա օրերին կշարունակեն իրենց շփումները՝ հանդես գալով Սիրիայի շուրջ հայտարարություններով։
Հիշեցնենք, որ վերջին մեկ շաբաթվա ընթացքում սա Սիրիայի հարցի շուրջ Դավութօղլուի ու Քլինթոնի երրորդ հեռախոսազրույցն էր։ Մյուս երկու հեռախոսազրույցները նախորդել և հաջորդել էին Դավութօղլուի սիրիական առաքելությանը։
