Ավելի քան 60 երկրների իշխանություններ համատեղ հայտարարությամբ կոչ են արել բոլոր կողմերին ապահովել օտարերկրացիների և Աֆղանստանը լքել ցանկացող աֆղանների անվտանգ դուրսբերումը։ Համապատասխան հայտարարությունը հրապարակվել է Պետդեպի կայքում։
«Հաշվի առնելով իրավիճակի վատթարացումն անվտանգության ոլորտում, մենք կոչ ենք անում բոլոր կողմերին հարգել և նպաստել օտարերկրացիների և երկիրը լքել ցանկացող աֆղանների անվտանգ և կանոնակարգված տարհանմանը»,-ասված է հայտարարության մեջ։
Երկրների իշխանությունները կոչ են արել նաև չփակել ճանապարհները, օդանավակայանները և սահմանային անցակետերը։
Ավելի վաղ հաղորդվել էր հրաձգության մասին մայրաքաղաք Քաբուլի օդանավակայանի շրջանում, որտեղ կատարվել է տարբեր երկրների դեղապանատների աշխատակիցների տարհանում։
Աֆղանստանի ՆԳ նախարարի պաշտոնակատար Աբդուլ Սաթար Միրզակվալը հայտարարել էր մայրաքաղաքի տարածքում 21։00-ից պարետային ժամ սահմանելու մասին՝ ասելով, որ «Թալիբանը» չի գրոհի Քաբուլը, և որ այնտեղ «տեղի է ունենում խաղաղ իշխանափոխություն»։