Ֆրանսիայի նախագահ Էմանուել Մակրոնը ցինիկ է համարում ֆրանսիացիների գործողությունները, որոնք ցույց են անցկացնում երկրում սանիտարական անցաթղթերի ընդլայնման և բժշկական անձնակազմի պարտադիր պատվաստումների ներդրման դեմ: Երկրի ղեկավարն այդ մասին ասել է կիրակի օրը Ֆրանսիական Պոլինեզիա կատարած քառօրյա աշխատանքային այցի ընթացքում, Պապեետե գլխավոր հիվանդանոցում, որտեղ նրան սպասել են մի խումբ ցուցարարներ:
«Կան մարդիկ, որոնք այժմ դիմում են ցինիկ և իռացիոնալ գործողությունների՝ հասարակական կարծիքը շահարկելու համար: Ոչ մի ազատություն հնարավոր չէ առանց որոշակի պարտականությունների կատարման: Եթե մարդը ցանկանում է ազատ լինել, եթե հարգում և սիրում է այլ մարդկանց, ապա միակ բանը, որ նա պետք է անի ՝ պատվաստվելն է, դա մերժելը անպատասխանատու վարք և եսասիրություն է», – ասել է Մակրոնը:
Ինչպես հայտնել ենք, Ֆրանսիան պարտադիր պատվաստում է սահմանել բժշկական անձնակազմի և մի շարք այլ կատեգորիաների աշխատողների համար:
Ֆրանսիայի նախագահը նշել է, որ վստահ է որոշման ճիշտ լինելու մեջ: «Ես այս որոշումը կայացրել եմ լրիվ գիտակցված, ես լիովին վստահ եմ դրա ճիշտ լինելու մեջ», – ասել է Մակրոնը: Նա նաև նշել է պատվաստումը շարունակելու անհրաժեշտությունը: «Մենք ունենք համավարակի դեմ զենք. դա պատվաստումն է, այն պետք է օգտագործվի: Պատվաստանյութը շատ մատչելի է, մենք ունենք հարյուր հազարավոր չօգտագործված դեղաչափեր, հիմա պետք է ամենուր շարունակենք պատվաստումները», – ասել է նա: Մակրոնը հիշեցրել է, որ աշխարհում «ավելի քան 3 միլիարդ մարդ արդեն պատվաստվել է տարբեր տեսակի պատվաստանյութերով»: «Եվ մենք գիտենք, որ այդ պատվաստանյութերը պաշտպանում են նաև կորոնավիրուսի նոր շտամներից», – ասել է Ֆրանսիայի նախագահը:
Սանիտարական անցաթղթերի լայն կիրառման միջոցառումները երկրի բնակչության մի մասը բացասաբար է ընդունել. բողոքի ցույցերը չեն դադարում արդեն երկու շաբաթ: Շաբաթ օրը անցկացվել է շուրջ 170 նմանատիպ ակցիա, դրանց մասնակիցների թիվը հանրապետության ողջ տարածքում գերազանցել է 160 հազարը, իսկ Փարիզում ցույցի է դուրս եկել առնվազն 11 հազար մարդ:
