«ՀԱՊԿ-ը և ՀԱՊԿ անդամ պետությունները պետք է ավելի հստակ արտահայտվեն Սյունիքի դեպքերի առնչությամբ»:
Այսօր ԱԺ-ում հայտարարեց «Իմ քայլը» խմբակցության պատգամավոր Միքայել Զոլյանը՝ անդրադառնալով ադրբեջանցիների՝ ՀՀ տարածք ներխուժելու դեպքին։
«Ստեղծված իրավիճակի ուղղությամբ, իհարկե, մեծ աշխատանք է տարվում, սակայն մեծ մասը չի երևում, միայն այսբերգի գագաթն է երևում: Ճիշտ կլիներ, որ մեր դաշնակիցները հստակ արտահայտվեին առ այն, որ ՀՀ տարածքային ամբողջականությունը կասկածի տակ դնող գործողություններն անընդունելի են և հետևանքներ են ունենալու»,- ասաց Զոլյանը:
Պատգամավորը կոչ արեց ՀԱՊԿ անդամ երկրների խորհրդարաններում շատերը նույն միտքը հասցնեն իրենց կառավարություններին, որովհետև այստեղ ՀԱՊԿ հեղինակության հետ գործ ունենք՝ որպես անվտանգային համակարգի, և սա միայն ՀՀ խնդիր չէ։
