Ամերիկյան Բոստոն քաղաքում կայացած աճուրդում վաճառվել է ֆիզիկոս Ալբերտ Էյնշտեյնի ձեռնագիր նամակը, որում անդրադարձ է կատարվում E=mc2 բանաձևին։ Այս մասին ասվում է RR Auction աճուրդի տան կայքում։ Նշենք, որ այդ բանաձևն արտահայտում է զանգվածի և էներգիայի համարժեքությունը։
1946 թվականի հոկտեմբերի 26-ին թվագրված ուղերձի համար անհայտ գնորդը վճարել է 1 243 707 դոլար։ Լոտի մեկնարկային գինը կազմել է 400 հազար դոլար։
Գերմաներենով գրված նամակը հասցեագրված է բժիշկ Լյուդվիգ Զիլբերշտեյնին։
«Ձեր հարցին կարելի է պատասխանել՝ ելնելով E=mc2 բանաձևից՝ առանց բազմագիտակության»,-նշված է նամակի սկզբում։
Նշվում է, որ աշխարհում հայտնի է Էյնշտեյնի ձեռքով գրված այդ բանաձևի ընդամենը 4 օրինակ։ Վերոնշյալ նմուշը, որը պահպանվել է լավ վիճակում, լայն հանրությանը ներկայացվում է առաջին անգամ։