Երևանի ընդհանուր իրավասության դատարանը մերժել է Արթուր Այվազյանին՝ «Մանախին» կալանավորելու մասին քննիչի միջնորդությունը, միևնույն ժամանակ՝ ոչ իրավաչափ է ճանաչել Այվազյանի ձերբակալությունը՝ բավարարելով փաստաբանի բողոքը։
Հիշեցնենք, որ Սյունիքում բողոքի ակցիա է տեղի ունեցել՝ փակել Հայաստան-Արցախ ճանապարհը։ Ազատամարտիկները պահանջել են, որ իրենց վերադարձնել իրենցից հավաքված զենքերը՝ Սյունիքի սահմանը պաշտպանելու համար, բացի այդ՝ զինել սյունեցիներին։ Ակցիաների ընթացքում 8 անձ բերման է ենթարկվել ոստիկանություն, իսկ Արթուր Այվազյանը՝ ձերբակալվել՝ խուլիգանության կասկածանքով։
Ձերբակալության արձանագրության համաձայն՝ նախաքննական մարմինը հակաիրավական է գնահատել բողոքի ակցիան՝ նշելով, թե ժամը 15։30-ի սահմաններում հասարակական վայր հանդիսացող Գորիս-Ստեփանակերտ ավտոճանապարհի Տեղ բնակավայրի բենզալցակայանի դիմացի ճանապարհահատվածում մի խումբ անձինք, բացահայտ անհարգալից վերաբերմունք ցուցաբերելով համայնքի բնակիչների և երթևեկության մասնակիցների նկատմամբ, շուրջ 20 րոպե փակել են ավտոճանապարհը՝ կաթվածահար անելով երթևեկությունը, որի ընթացքում քաշքշել են իրենց «հակաիրավական գործողությունները կանխող» անձանց։
Փաստաբանը բողոքարկել է ձերբակալության իրավաչափության հարցը, սակայն մինչ դատարանը քննության կառներ պաշտպանի բողոքը, վարույթն իրականացնող մարմինը մեղադրանք է առաջադրել Այվազյանին և նրա նկատմամբ կալանավորումը որպես խափանման միջոց ընտրելու մասին միջնորդություն է ներկայացրել դատարան։