Հայաստանի 1,450 հանրակրթական ուսումնական հաստատություններ ներկայում ապահովված են 16,760 համակարգիչներով: Դպրոցներից 1,180-ը (81.4%) հնարավորություն ունի միանալ համացանցին: Կրթական տեխնոլոգիաների ազգային կենտրոնից «Առաջին լրատվականին» տրամադրած տվյալների համաձայն, Հայաստանի դպրոցական ինտերնետային ցանցում ընդգրկված է 937 դպրոց (64.6%):
«Ապագայում Հայաստանի բոլոր դպրոցները կմիավորվեն ընդհանուր ցանցում»,- նշեց ԿՏԱԿ-ի գլխավոր մասնագետ Սամվել Մանուկյանը:
Համակարգիչներով առավել շատ ապահովված են Երևանի դպրոցները (1 դպրոցում միջինում կա 18.6 համակարգիչ), իսկ առավել քիչ (7.8 համակարգիչ)՝ Արագածոտնի:
Երևանյան դպրոցներում կա 4,818 համակարգիչ, ինտերնետ կապով ապահովված են 252 դպրոցներ: Արագածոտնի դպրոցներում կա 971 համակարգիչ, ինտերնետ առկա է 72 դպրոցում: Արարատի դպրոցներում կա 1,258 համակարգիչ, ինտերնետով ապահովված է 106 դպրոց: Արմավիրի դպրոցներում կա 1,302 համակարգիչ, համացանցով ապահովված են 119 դպրոցներ: Գեղարքունիքի մարզի դպրոցներն ունեն 1,304 համակարգիչներ, 114 դպրոց միացած է համացանցին: Լոռու մարզային դպրոցներն ունեն 1,521 համակարգիչ, 130 դպրոցներում նաև ինտերնետ կապ կա: Կոտայքի մարզի դպրոցներն ունեն 1,437 համակարգիչ, 99 դպրոց ունի համացանց: Շիրակի մարզի դպրոցներում կա 1,687 համակարգիչ, համացանց՝ 132 դպրոցներում: Սյունիքի մարզի դպրոցներում կա 1,140 համակարգիչ, 72 դպրոցներում՝ համացանց, Վայոց ձորի դպրոցներում՝ 535 համակարգիչ, համացանց՝ 23 դպրոցներում: Տավուշի մարզի դպրոցներն ապահովված են 802 համակարգիչներով, իսկ 61 դպրոցներ՝ ինտերնետ կապով:
