Այսօրվանից մի քանի օրով կասեցվում է Երևանի թիվ 112 մանկապարտեզի աշխատանքը: Այս մասին տեղեկացնում է Նոր Նորք վարչական շրջանը:
«Օրերս մանկապարտեզի երեք երեխաներ հոսպիտալացվել են՝ «աղիքային վարակ և սուր գաստրոէնտերիտ» նախնական ախտորոշմամբ: Երեխաներից վերցված նմուշների մանրէաբանական հետազոտության արդյունքում նախնական ախտորոշումը հաստատվել է: Նույն մանկապարտեզ հաճախող ևս մի քանի երեխա՝ աղիքային վարակին բնորոշ գանգատներով, բուժումը ստանում են տանը: Վարակի պատճառները հայտնաբերելու, ինչպես նաև՝ դրա տարածումը կանխարգելելու նպատակով նշված մանկապարտեզը մի քանի օր փակ կմնա, որից հետո կվերսկսի աշխատանքը:
Պատճառած ժամանակավոր անհարմարությունների համար հայցում ենք Ձեր ներողամտությունը»,-ասված է շրջանի ֆեյսբուքյան գրառման մեջ:
Հիշեցնենք, որ մայիսի 3-ին «Արաբկիր» բժշկական համալիր-երեխաների և դեռահասների առողջության ինստիտուտից ՀՀ ԱՆ Հիվանդությունների վերահսկման և կանխարգելման ազգային կենտրոնին տեղեկացրել էին «Աղիքային վարակ և սուր գաստրոէնտերիտ» նախնական ախտորոշմամբ 3 երեխայի հոսպիտալացման վերաբերյալ. 1-ը՝ 6 տարեկան, 2-ը՝ 5 տարեկան:
Երեխաների գանգատները սկսվել էին մայիսի 1-ին՝ արյունային լուծ, 38-39 C ջերմություն: Լաբորատոր հետազոտության նպատակով ստացիոնարում վերցված կղանքի մանրէաբանական հետազոտության արդյունքում հայտնաբերվել է E.Coli, վերջնական ախտորոշում էր դրվել՝ «Էշերիխիոզ»:
