Իրանի գերագույն առաջնորդ Ալի Խամենեին երկրի արտաքին գործերի նախարար Մոհամմադ Ջավադ Զարիֆի զրույցի արտահոսքի հետ կապված սկանդալի ֆոնին հայտարարել է, որ ԱԳՆ-ն չի որոշում երկրի արտաքին քաղաքականությունը, այլ միայն իրականացնում է բարձրագույն ղեկավարության նախանշած արտաքին քաղաքականության ուղղությունները: Այս մասին հաղորդում է РИА Новости գործակալությունը։
«Աշխարհում ոչ մի տեղ արտաքին գործերի նախարարությունը չի որոշում արտաքին քաղաքականության ուղղությունը, որին պետք է հետևի երկիրը։
Սակայն կա բարձրագույն ղեկավարություն, որը որոշում է արտաքին քաղաքականությունը, իսկ ԱԳՆ-ն միայն դրա իրականացնողն է»,- ասել է Խամենեին։
Ըստ Իրանի գերագույն առաջնորդի՝ հենց Իսլամական հեղափոխության պահապանների կորպուսն է գլխավոր դերակատարում ունեցել այն հարցում, որ Իրանը կարողանա արևմտյան երկրներից անկախ արտաքին քաղաքականություն վարել։
Խամենեին նշել է, որ «որոշ պաշտոնյաների հայտարարությունները»՝ կապված ԻՀՊԿ-ի և գեներալ Սոլեյմանիի հետ, «ցնցում են և վշտացնում»։ Խամենեին հավելել է, որ նման հայտարարությունները կրկնում են ԱՄՆ-ի «թշնամական հայտարարությունները», ինչն անթույլատրելի է։
Իրանի ԱԳ նախարար Ջավադ Զարիֆը Instagram-յան գրառմամբ ներողություն է խնդրել իր մեկնաբանությունների համար։
Լրատվամիջոցներում ավելի վաղ հրապարակվել էր մարտ ամսին իրանցի տնտեսագետ Սաիդ Լիլազի հետ Զարիֆի զրույցի ձայնագրության մի հատված: Այս երկխոսության ընթացքում իրանցի նախարարը, մասնավորապես, նշում էր, որ Թեհրանի արտաքին քաղաքականության ուղղությունում և Մոսկվայի հետ բանակցություններում մեծ դերակատարում է ունեցել Իսլամական հեղափոխության պահապանների կորպուսի հատուկ ստորաբաժանման նախկին հրամանատար, գեներալ Ղասեմ Սոլեյմանին, որը մեկ տարի առաջ զոհվել էր Իրաքում ԱՄՆ-ի ավիահարվածի հետևանքով:
