Համահայկական խաղերը սկսվելու են օգոստոսի 13-ին՝ 21:00-ին, Վազգեն Սարգսյանի անվան Հանրապետական մարզադաշտում կայանալիք բացման շքեղ արարողությամբ։ Այդ առիթով ժամանակավորապես կդադարեցվի կենտրոնից մարզադաշտ տանող ճանապարհների երթևեկությունը։
Ժամը 17:00-ից մինչ օրվա վերջ փակ են լինելու Ալեք Մանուկյան, Սայաթ-Նովա, Չարենց, Նար-Դոս, Երվանդ Քոչար, Խանջյան, Վարդանանց փողոցների որոշ հատվածներ։ Այս մասին հայտարարում է ՀՀ ՃՈ ճանապարհապարեկային ծառայության բաժնի պետ Նորիկ Սարգսյանը։
Սարգսյանը տեղեկացնում է նաև, որ այս տարի նախատեսված է Երևանի կենտրոնում տեղադրել արագություն չափող 15 սարք և 10 տեսախցիկ՝ երթևեկությունը վերահսկելու համար, և որպեսզի ոստիկանների որոշումները չվիճարկվեն վարորդների կողմից։ Շուտով կանցկացվի ՃՈ ավանդական տասնօրյակը՝ ուսումնական տարվա մեկնարկին ընդառաջ։
Ճանապարհային պատահարների դեպքերի գրանցված աճին զուգընթաց՝ այս տարի պատասխանատվության են ենթարկվել ավելի շատ հետիոտներ՝ 6288 մարդ՝ փողոցը սխալ անցնելու համար։
