Ադրբեջանի նախագահ Իլհամ Ալիևը, Ադրբեջանի դիվանագիտական ակադեմիայում պատասխանելով հետպատերազմյան շրջանում ԱՄՆ դերակատարության մասին հարցին, հայտարարել է, որ ԱՄՆ-ն բացակայում է, ԱՄՆ վարչակազմի կողմից հունվարից ի վեր ոչ մի հաղորդագրություն չի ստացել:
«Արդեն ապրիլն է: Զրո: Եվ ոչ մի զանգ»,- ասել է Ադրբեջանի նախագահը:
Ըստ Report պորտալի՝ Ալիևը չի մոռացել նշել, որ պետքարտուղար Էնթոնի Բլինքենը դեռ հունվարին զանգել է Հայաստանի ղեկավար Նիկոլ Փաշինյանին:
«Չգիտեմ՝ ինչի մասին են խոսել, բայց հավասարակշռությունը խախտվել է: Ես չեմ ասում, թե ուղերձի ենք սպասում: Սակայն Միացյալ Նահանգները ԵԱՀԿ Մինսկի խմբի համանախագահ երկիր է: ԱՄՆ-ն գոնե արտաքուստ պիտի հավասարակշռված մոտեցում ցուցաբերեր»,- նշել է Ալիևը:
Ադրբեջանի նախագահը շեշտել է, որ առ այսօր ԱՄՆ վարչակազմից ստացած միակ հաղորդագրությունը նախագահ Ջո Բայդենի շնորհավորանքն է եղել Նովրուզի առիթով:
Ամերիկագետ Սուրեն Սարգսյան, «Առաջին լրատվական»-ի հետ զրույցում անդրադառնալով Ալիևի հայտարարություններին, նշեց. «Խոսելով Ադրբեջանի նկատմամբ Միացյալ Նահանգների քաղաքականության մասին, պետք է մի քանի կարևոր առանձնահատկություն հաշվի առնենք։ Բնականաբար, Ալիևը փորձում է մանիպուլացնել իրավիճակը ու միջազգային հանրության ուշադրությունը շեղել այն հանգամանքից, որ Միացյալ Նահանգները՝ լինելով Մինսկի խմբի համանախագահ, վերջին մի քանի տարիների ընթացքում շուրջ 100 միլիոն դոլարի ռազմական օգնություն է ցուցաբերել Ադրբեջանին։ Կարծում եմ՝ չափազանց կարևոր է այս հանգամանքը հաշվի առնել։ Երկրորդ՝ պետք է նաև հաշվի առնենք, որ նոր վարչակազմը դեռևս ձևավորման լուրջ փուլում է գտնվում։ Իհարկե, բարձրաստիճան պաշտոնյաները հունվարից ի վեր նշանակվել են, սակայն այստեղ դեռևս ձևավորվում է մի քաղաքական թիմ, որն ունենալու է նոր առաջնահերթություններ՝ կապված արտաքին քաղաքականության հետ»․
Սարգսյանն ընդգծեց՝ Ալիևը ճիշտ է նկատել, պետքարտուղարը խոսել է Նիկոլ Փաշինյանի հետ, բայց, օրինակ, նախագահի մակարդակով որևէ նամակ կամ մեսիջ ՀՀ վարչապետը չի ստացել. «Այսինքն՝ այո՛, հեռախոսազրույց եղել է, բայց շնորհավորական ուղերձ ԱՄՆ նախագահ Բայդենը Նիկոլ Փաշինյանին որևէ առիթով չի հղել, այլ առիթներով ուղերձներ ևս չեն եղել։ Իսկ այն մեսիջը, որ ստացել է Ալիևը Բայդենից՝ բավականին տարողունակ է, խոսք կա նաև Լեռնային Ղարաբաղի հակամարտության լուծման մասին։ Միացյալ Նահանգները համոզմունք է հայտնում, որ Լեռնային Ղարաբաղի խնդիրը դեռևս կարգավորված չէ՝ ի հեճուկս Ալիևի հայտարարություններին։ Կարծում եմ՝ հենց այդ հանգամանքն էլ զայրացրել է Ալիևին»։
Մեր զրուցակցի խոսքերով՝ Ալիևի անադեկվատ ընկալումները ձևավորվել են Բայդենի մի քանի կարևոր մեսիջներից, որոնք վերաբերում էին 907 բանաձևին, Ցեղասպանության ճանաչմանը. «Կարծում եմ՝ սրանով Ալիևը փորձ է անում շանտաժի ենթարկել, որպեսզի 907 բանաձևը նորից շրջանառության մեջ չդնեն, և որպեսզի 907-րդ բանաձևը նորից իրավական ուժ չունենա, որով նախատեսվում է Ադրբեջանին տրամադրվող ցանկացած տեսակի օգնության զրոյականացում»։
Հարցին՝ կա՞ միտում փորձել տապալել Մինսկի խմբի ֆորմատը, Սուրեն Սարգսյանը պատասխանեց. «Բնականաբար, կա նման միտում, որովհետև ադրբեջանցիները ցանկանում են նոր ձևաչափ ստեղծել, և այդ նոր ձևաչափում իրենք տեսնում են Թուրքիայի մասնակցությունը։ Իսկ Մինսկի խումբն ու համանախագահները ձևաչափի փոփոխություն չեն ցանկանում, հետևաբար՝ չեն ցանկանում, որ Թուրքիան ներգրավվածություն ունենա այս հակամարտության կարգավորման մեջ։ Սա վերաբերում է բոլոր համանախագահներին, և մանավանդ Մինսկի խմբի վերջին հայտարարությունից հետո մենք տեսանք, որ բոլոր համանախագահները միահամուռ են, որ բանակցությունները պետք է ընթանան Մինսկի խմբի ձևաչափով»։
