Արտահերթ ընտրությունների հարցն առկախվում է: Սա գուցե շատերի համար անսպասելի էր, բայց մյուս կողմից էլ տրամաբանական էր, քանի որ արտահերթ ընտրությունների անցկացման հանրային պահանջ չձևավորվեց: Այս մասին «Առաջին լրատվական»-ի հետ զրույցում ասաց «Գլոբալիզացիայի և տարածաշրջանային համագործակցության կենտրոնի» ղեկավար, քաղաքագետ Ստեփան Գրիգորյանը:
«Վարչապետը սկզբում ասաց, որ համաձայն է արտահերթ ընտրություններ անցկացնելու տարբերակին, բայց և՛ խորհրդարանական, և՛ արտախորհրդարանական ընդդիմությունը չհամաձայնեց, ինչ որ նախապայմաներ դրեց: Այսինքն՝ արտահերթ ընտրություններ անցկացնելու պահանջը չձևավորվեց նաև քաղաքական դաշտում, այդ հարցի շուրջ չկա կոնսենսուս»,- նշեց Գրիգորյանը՝ հավելելով, որ հնարավոր է նաև իշխանությունը մանևրում է:
Քաղաքագետի դիտարկմամբ՝ այսօր անիմաստ է արտահերթ ընտրություններ անցկացնել. «Ի՞նչ խորհրդարան կստանանք, եթե այսօր կազմակերպենք արտահերթ ընտրություններ, մենք տեսնում ենք սև-սպիտակ պատկեր, օրակարգեր դեռ չկան: Միգուցե մի քանի ամիս հետո, հասարակությանը նախապատրաստելով, օրակարգեր ձևավորելով, քննարկումներ անցկացնելով՝ հնարավոր լինի անցկացնել արտահերթ ընտրություններ, իսկ հիմա եթե անցկացվեն, նորից միակուսակցական համակարգ կունենանք, լավագույն դեպքում նորից մեկ-երկու ընդդիմադիր խմբակցություն կլինի՝ ծայրահեղ մոտեցումներով, ես չեմ համարում այս պահին ընտրությունների անցկացումը ճիշտ: Թեև անհրաժեշտություն կա քաղաքական դաշտը թարմացնելու, բայց պայմանները շատ կարևոր են»:
Գրիգորյանի դիտարկմամբ՝ արտահերթ ընտրություններն առկախվում են մինչև հունիս. «Վարչապետը ճանապարհային քարտեզը ներկայացրեց՝ ասելով, որ մինչև հունիս աշխատեն, հետո որոշում կընդունեն»:
Անդրադառնալով ներքաղաքական զարգացումներին, քաղաքագետը կարծիք հայտնեց, որ ինչ-որ խմբեր Հայաստանի հասարակության վրա փորձում են փաթաթել ինչ-որ ռուսական օրակարգեր. «17 ուժերը պրոռուսական են, բայց չեմ կարծում, թե ուզում են, որ Հայաստանը անկախությունը կորցնի: Բայց կա նախաձեռնություն և կան դեմքեր, որոնք ուզում են, որ Հայաստանը մտնի ՌԴ կազմի մեջ: Դա Սահմանադրության դեմ ուղղված քայլ է, և պետք է ԱԱԾ-ն ու դատախազությունն աշխատեն՝ պարզելու այդ հայտարարությունները մեր պետականությանը, մեր տարածքների ամբողջականությանը հակասում են թե ոչ»:
«17-ի շարժումը մարում էր, Ռոբերտ Քոչարյանը փորձ է անում վերաիմաստավորել այդ շարժումը»,- ընդգծեց Ս. Գրիգորյանը:
Մանրամասն՝ տեսանյութում:
