Ադրբեջանական Salam News գործակալությանը տրված հարցազրույցի ժամանակ Ադրբեջանում ԱՄՆ դեսպան Մեթյու Բրայզան հրաժարվել է մեկնաբանել ԱՄՆ Կոնգրեսի կողմից 2012 թվականին Լեռնային Ղարաբաղին ֆինանսական օգնություն չտրամադրելու հարցը.
«Օգնության ծավալն ու հասցեատիրոջը որոշում է անմիջականորեն Կոնգրեսը։ Այդպիսի հարցերը գտնվում են ԱՄՆ Կոնգրեսի իրավասության ներքո, ինչի համար էլ ես չեմ կարող մեկնաբանել դրանք»։
Բրայզան նաև անդրադարձել է Հայաստանի ու Ադրբեջանի նախագահների հերթական հանդիպման կազմակերպմանը և տվյալ գործընթացում ԱՄՆ-ի ակտիվացման հնարավորությանը.
«ԱՄՆ-ը ամենաբարձր մակարդակով մասնակցում է ղարաբաղյան հակամարտության կարգավորմանը։ Նախագահ Բարաք Օբաման և Պետքարտուղար Հիլարի Քլինթոնը շահագրգռված են ղարաբաղյան հակամարտության կարգավորմամբ։ Հակամարտության կարգավորման ուղղությամբ հաջորդ քայլը կորոշի ԵԱՀԿ Մինսկի խումբը։
Ինչ վերաբերում է հակամարտության կարգավորման գործընթացում Իրանի հնարավոր միջնորդությանը, ապա ԵԱՀԿ Մինսկի խումբն արդեն իսկ որոշակի արդյունքեր է գրանցել հակամարտության կարգավորման շուրջ։ Մենք կարծում ենք, որ ԵԱՀԿ Մինսկի խումբը նորմալ գործում է և արդեն իսկ աշխատում է «շրջանակային համաձայնագրի» վրա։
Թեև փաստաթղթի նախապատրաստման մեջ մնացել են մի շարք խնդիրներ, հակամարտության կարգավորման գործընթացը պետք է ավարտին հասցնի ԵԱՀԿ Մինսկի խումբը»։