Այսօր տեղի ունեցավ ՀՀ սփյուռքի նախարարության «Արի տուն» ծրագրի 5-րդ փուլի բացումը, որին մասնակցում էին 8 երկրներից (Նիդերլանդներ, Գերմանիա, Իտալիա, Չեխիա, ԱՄՆ, Ռուսաստան, Ուկրաինա, Վրաստան) 175 պատանիներ և աղջիկներ:
ՀՀ սփյուռքի փոխնախարար Ստեփան Պետրոսյանը իր խոսքում հայտնեց, որ ծրագիրն այս տարի ունի երկու կարևոր առանձնահատկություն.
«Այսօր մենք սկսում ենք մեր այս տարվա «Արի տուն» ծրագրի 5-րդ փուլը, որն ունի մեծ ծավալ։ Մինչ այժմ այս ծրագրին մասնակցել է շուրջ 450 երեխա։ Այս տարի ծրագիրն ունի երկու առանձնահատկություն. առաջինը հյուրընկալ ընտանիքների և ճամբարային մասն է՝ վերջին 4 օրը հնարավորություն եք ստանում անցկացնել Աղվերանի «Կարին» ճամբարում։ Նախորդ տարիներին այդպիսի բան չի եղել։ Փորձը ցույց է տալիս, որ սա շատ հաջողված տարբերակ է, և բոլորը գոհ են, երկրորդ առանձնահատկությունը այն է, որ, ի տարբերություն նախորդ տարիների, այս տարի շատ ակտիվ են մեր մարզերը՝ հատկապես երևանամերձ մարզերը»։
Ս. Պետրոսյանը նաև հավելեց, որ ծրագիրն ունի կարևոր բաղադրիչներ.
«Ծրագիրն ունի մի քանի բաղադրիչ, ամենակարևոր բաղադրիչները մենք համարում ենք ուսուցողականը և ճանաչողականը, չնայած, անշուշտ, կա նաև մշակութային բաղադրիչը»։
Փոխնախարարի խոսքով՝ այդ բաղադրիչները նախատեսում են որոշակի միջոցառումներ, որոնք կլրացնեն «Արի տուն» ծրագրի օրագիրը.
«Այս ծրագրի նպատակը ձեզ ձեր մայրենի երկիրը ճանաչելի դարձնելն է։ Ցավոք, կան աշխարհի տարբեր երկրներում ապրող հայ երիտասարդներ, որոնք մինչև 20 տարեկանը իրենց մայրենի երկրում չեն եղել։ Պետությունը այս հնարավորությունը տալիս է, որ դուք մոտիկից ճանաչեք մայր հայրենիքը և հպարտանաք մեր մշակույթով, մեր անցած ճանապարհով։ Ես հավատացած եմ, որ 14 օր հետո այս ծրագիրը փակելիս երբ հանդիպենք, ձեր աչքերի մեջ կտեսնենք կայծ, կտեսնենք բոցավառված հայկական գեներ, և դուք անպայման հաջորդ տարի ևս կցանկանաք գալ ու մասնակցել»։
Ծրագրի մասնակիցներին «Արի տուն» տարբերանշանով վերնաշապիկներ և գլխարկներ էին բաժանվել, և փոխնախարարը կոչ արեց դրանք պարբերաբար կրել։
