ԱՄՆ նախագահ Դոնալդ Թրամփը Մեծ Բրիտանիայի պատվիրակության հետ ճաշի ժամանակ բղավել է ազգային անվտանգության հարցերով իր նախկին խորհրդական Մայք Ֆլինի վրա այն բանից հետո, երբ իմացել է, որ բաց է թողել Ռուսաստանի նախագահ Վլադիմիր Պուտինի հեռախոսազանգը: Այս մասին հայտնել է Մեծ Բրիտանիայի կառավարության նախկին բարձրաստիճան օգնականը, որը ներկա է եղել միջոցառմանը՝ փոխանցում է Newsweek-ը:
Նիք Թիմոթին (Nick Timothy)՝ Մեծ Բրիտանիայի նախկին վարչապետ Թերեզա Մեյի օրոք Դաունինգ-սթրիթի վարչակազմի նախկին ղեկավարը, What You Were Thinking-ի փոդքաստին պատմել է, որ 2017 թվականին Սպիտակ տանը այլ խորհրդականների հետ պաշտոնական ճաշի ժամանակ ինչ-որ մեկը «իմիջիայլոց հիշեցրեց, որ Վլադիմիր Պուտինը խնդրել է խոսել (Թրամփի հետ), և հենց մեր առաջ նա (Թրամփը) բղավեց Մայք Ֆլինի վրա»:
«Իսկապես բղավեց: Դա տեղի է ունեցել պաշտոնական ճաշի ժամանակ ծառայապետների հետ և գեղեցիկ սպասքով, և նա, ինչպես հարկն է, բղավեց նրա վրա սեղանի մյուս կողմում»,- պատմել է Թիմոթին: Նա հավելել է, որ Թրամփը բղավել է Ֆլինի վրա. «Եթե Պուտինը ցանկանում է զանգահարել ինձ, ուղղակի միացրեք ինձ նրա հետ»:
Հունվարի 4-ին հաղորդվել է, որ լրագրող Փիթեր Բերգենը պատմել է 2017 թվականին Ռուսաստանի նախագահի բաց թողնված զանգի նկատմամբ Թրամփի արձագանքի մասին: Ավելի ուշ ԽՍՀՄ և Ռուսաստանի առաջին նախագահի պրոտոկոլային ծառայությունների նախկին ղեկավար Վլադիմիր Շևչենկոն բաց թողնված զանգի մասին տեղեկատվությունը անվանել է «ֆեյք»: «Ի՞նչ է նշանակում «զանգը բաց թողնել»: Եթե Թրամփը չի ցանկացել խոսել Պուտինի հետ և սկսում է դեսուդեն ընկնել արդարանալու համար՝ դա այլ հարց է: Որոշումը՝ պատասխանել զանգին, թե ոչ, կայացնում է նախագահը»,- նշել է փորձագետը: