Նիկոլ Փաշինյանը վերջին օրերին շրջում է մարզերով, ծանոթանում կատարված և կատարվող աշխատանքներին, շփվում մարդկանց հետ, և շատերի գնահատմամբ՝ սա կարելի է համեմատել ընտրական արշավի մեկնարկ՝ հատկապես անընդհատ խոստացվող թեժ աշնան համատեքստում: «Առաջին լրատվական»-ի հետ զրույցում անդրադառնալով այս դիտարկմանը՝ ԱԺ «Իմ քայլը» խմբակցության պատգամավոր Արթուր Հովհաննիսյանը կարծիք հայտնեց, որ ամենևին չենք կարող դա համարել նախընտրական արշավի մեկնարկ. «Պետք է վերջ տանք այն պրակտիկային, որ միայն ընտրությունների ժամանակ էին կառավարության ղեկավարը, անդամները, պատգամավորները կամ պաշտոնյաները հանդիպում քաղաքացիների հետ, շրջում մարզերում: Հեղափոխությունից հետո շրջայցերը, ծանոթությունը կատարված աշխատանքներին կարելի է համարել նորմալ աշխատանքային պրոցես: Այս արձակուրդի ընթացքում պատգամավորները նույնպես շրջայցեր են կատարում, սա մեր ընթացիկ աշխատանքն է: Եթե նախընտրական որևէ պրոցես մեկնարկվի, այդ մասին կհայտարարվի, և որևէ քայլ չի արվի՝ քողարկելով նախընտրական պրոցեսը»,- նշեց Արթուր Հովհաննիսյանը:
«Մենք խոսել ենք այն մասին, որ քաղաքական դաշտում լճացում է՝ նկատի ունենալով հին ուժերի և հեղափոխական ուժերի «փոխհրաձգությունը», և նշել էինք, որ դրա այլընտրանքի բացակայությունը հաղթահարելու ճանապարհը պոզիտիվ օրակարգի ձևավորումն է կառավարության կողմից: Թերևս, վարչապետի այս քայլը կարող ենք համարել այդ լուծմանն ուղղված առաջին քայլերից մեկը: Սա, իհարկե, նոր քայլ չէ, բայց կորոնավիրուսի ճգնաժամից հետո դիտարկվում է որպես պոզիտիվ օրակարգ: Գնդակն արդեն նոր ձևավորվող քաղաքական ուժերի դաշտում է, որոնք իրենց քայլը պետք է անեն, որպեսզի հաղթահարվի «հին-նոր» դիսկուրսը և զբաղվեն նոր քաղաքական դիսկուրսի ձևավորմամբ»,- նշեց քաղաքական վերլուծաբան Արեգ Քոչինյանը:
Ընդդիմադիր դաշտում բևեռների ձևավորման գործընթացը շարունակվում է, մասնագետներն առանձնացնում են երեք բևեռ՝ առաջին բևեռը Արթուր Վանեցյանն է՝ ԲՀԿ-ի և ՀՅԴ-ի առանցքում, երկրորդը Ռոբերտ Քոչարյանն է, երրորդը՝ ՀՀԿ-ն է՝ Սերժ Սարգսյանի գլխավորությամբ: Հնարավո՞ր է արդյոք այս բևեռների միավորում ներկայիս իշխանությունների դեմ, և այդ դեպքում ո՞վ կլինի առաջնորդը:
«Այդ երեք խմբակները արդեն իսկ համախմբված են նպատակի շուրջ, պարզապես այսօր նրանց գործիքակազմը և թիրախի ուղղություններն են տարբեր,- նշեց Արթուր Հովհաննիսյանը:- Վստահ եմ՝ նրանք մեկ ընդհանուր՝ Հայաստանը կեղեքած խմբակի անդամներ են և նպատակը մեկն է՝ ավելի շատ ոչ թե վերադարձ, այլ փրկություն: Քանի որ անընդհատ հայտարարվում է կոռուպցիայի դեմ պայքարի, նախկին հանցագործությունների բացահայտման մասին, նրանք վախենալու բան ունեն և պարզ է, որ որոշակի գործողությունների պետք է դիմեն՝ փորձելով վնասել իշխանությանը հանրության աչքերում և խանգարել աշխատել…»,- նշեց Արթուր Հովհաննիսյանը:
Արեգ Քոչինյանի խոսքով՝ էական չէ, թե ով է լինելու առաջին ջութակը. «Առավել էական է այն փաստը, որ այդ երեք խմբակից ոչ մեկը քաղաքական նպատակներ չունի. ունեն արդարադատությունից խուսափելու նպատակ»:
Մանրամասն՝ տեսանյութում:
