Բրիտանացի գիտնականները հրապարակել են իրենց հետազոտության արդյունքները, որի համաձայն՝ այն մարդկանց ուղեղի ծավալը, որոնք ապրում են հասարակածից հեռու վայրերում, ավելի մեծ է, քան նրանցը, ովքեր ծնվել և ապրում են հասարակածային շրջաններում: Այս մասին հաղորդում է BBC-ն: Բացի այդ, ինչպես նշում են գիտնականները, մեծ է նաև հասարակածից հեռու վայրերում ապրողների ակնախոռոչը:
Սակայն, ըստ մասնագետների տվյալների, այս հանգամանքը թույլ չի տալիս պնդել, թե ուղեղի ավելի մեծ ծավալ ունեցող մարդիկ ավելի խելացի են հասարակածային լայնություններում բնակվող մարդկանցից: Գիտնականների խոսքերով` ուղեղի ծավալի և ակնախոռոչի մեծությունը պայմանավորված են առաջին հերթին տարածքի կլիմայական պայմաններով: Արևի լույսի և ջերմության անբավարարությունը կոմպենսացվում է գանգախոռոչի մեծությամբ: