Հրապարակախոս Հրանտ Տեր-Աբրահամյանի հետ զրույցում «Առաջին լրատվականը» փորձեզ պարզել, թե որ դեպքերում կարող է կաթողիկոսը հրաժարվել Գրիգոր Լուսավորչի աթոռից:
Վերջինիս խոսքով՝ վերջին շրջանում ուժեղացած հասարակական տրամադրություններն ուղղված են ոչ թե եկեղեցու, այլ բարձրաստիճան որոշ պաշտոնյաների դեմ:
«Պատճառը պարզ է: Այդ բարձրաստիճան հոգևորականներն իրենց առաքելությունը չեն կատարում»,- ասաց նա՝ նշելով, որ թեև հստակ իրավական մեխանիզմ չկա, թե որ դեպքերում կաթողիկոսը կարող է հրաժարվել կամ նրան ինչպես կարող են ստիպել հրաժարվել իր աթոռից, սակայն պատմության ընթացքում «պաշտոնին չհամապատասխանող վարքի պատճառով» այդպիսի նախադեպեր ունեցել ենք:
Նա տեղեկացրեց, որ կաթողիկոսի ընտրությունը կատարվում է Ազգային եկեղեցական մեծ ժողովի կողմից և բնական է, որ ընտրողները կարող են նրան հետ կանչել:
«Պետք է լուրջ աշխատել ու հնարավոր է հասնել հաջողության»,- ասաց Հ. Տեր-Աբրահամյանը՝ ավելացնելով, որ համառության դեպքում հնարավոր է հասնել հարցի իրավական լուծմանը:
Հարցի գործնական լուծումը, ըստ նրա, պետք է իրականացվի իշխանափոխությանը զուգահեռ:
