Վանեցյանի հարցում գործ ունենք չստացված դերասանի հետ, իսկ ամառը թեժ է լինելու

Հայաստանի ներքաղաքական կյանքում հետաքրքիր զարգացումներ են տեղի ունենում: Վարչապետը երեկ ուշագրավ հայտարարություն է արել․ «Այնպիսի տպավորություն կա, որ Հայաստանում ոչ միայն առողջապահական կորոնավիրուս է տարածվում, այլև՝ քաղաքական կորոնավիրուս»։ Արդյոք իշխանությունը ունի՞ իմունտետ, քաղաքական վակցինա այդ կորոնավիրուսի դեմ պայքարելու համար, երբ վերջին շրջանում մի քանի ուղղություններով է գրոհը, ԱԺ «Իմ քայլը» խմբակցության պատգամավոր Արթուր Հովհաննիսյանը նկատում է՝ իշխանությունը և հանրությունը վաղուց ունեն իմունիտետ։ Անդրադառնալով քաղաքական դաշտի զարգացումներին, նշում է՝ այս գործողությունները չեն տեղավորվում քաղաքական տրամաբանության մեջ․ «Նախկին կարգը չէր տեղավորվում որևէ տիպի հանրապետության տրամաբանության մեջ, նախկինում երկիրը ղեկավարվում էր օլիգարխիայի միջոցով»։ Խոսելով Արթուր Վանեցյանի հայտարարությունների մասին, թե Հայաստանն այսօր չունի ԱԱԾ, այդ ծառայության տնօրենը, ինչպես և ոստիկանության և մյուս կառույցների ղեկավարը Նիկոլ Փաշինյանն է, նկատում է՝ Վանեցյանի հայտարարությունները բովանդակային առումով վերլուծման կարիք չունեն, դրանք պարզապես մեկ նպատակ են հետապնդում․ «Վանեցյանի հարցում գործ ունենք չստացված դերասանի հետ, իսկ ամառը թեժ է լինելու»։