«Առաջին լրատվական»-ի զրուցակիցն է գործարար Սիլվա Համբարձումյանը։
– Տիկին Համբարձումյան, օրերս հայտարարել էիք, որ բնապահպանության նախկին նախարար Արամ Հարությունյանին գտնելու համար մարդ եք վարձել: Դատական գործերն ի՞նչ փուլում են, և ի՞նչ նորություն կա այդ առումով:
– Նորություններ չկան: Արաքս Դիլանյանի, Վիկտոր Մարտիրոսյանի մասը քննիչն առանձնացրել է և ուղարկել դատարան: Արդեն դատական նիստի օրը նշանակված է: Երեկ դատարանում էի՝ Մակար Պետրոսյանի անջատված գործով, որի հետ ես կապ չունեմ: Ես վկայություն տվեցի, որ իրեն ճանաչում եմ, բայց իր հետ ոչ մի առիթով չեմ շփվել: Ինչ վերաբերում է Արամ Հարությունյանին, հիմա Մոսկվայում է, վերջերս Թուրքիայում էր, կինն էլ այստեղից էր գնացել:
Իրականում ես ոչ թե նոր եմ վարձել, այլ շուտ էի վարձել, գիտեմ, թե ինչպես է Երևանից գնացել, ոնց է Օգանովսկին Ղարաբաղից անցկացրել: Պարսկաստանից գնացել է Ստամբուլ, Ստամբուլից՝ Վրաստան, 2018-ի հունվարի ութին եղել է կազինոյում, դրանից հետո գնացել Թուրքիա, Թուրքիայից գնացել է Լիոն, հետո Լոնդոն, հետո եկել է Մոսկվա և մնացել այնտեղ:
– Ինքը գիտի՞, որ դուք իրեն հայտնաբերել եք:
– Ինքը վաղուց գիտի, որ ես իր տեղը գիտեմ, որովհետև ես իր շրջապատի մարդկանց մոտ խոսում եմ: Բայց մեկ է՝ ինքը վրացական անձնագիր էլ ունի:
– Հայաստանի իրավապահների կողմից և ՌԴ-ում ապաստան գտած անձանցից ոչ մեկին Ռուսաստանը չարտահանձնեց Հայաստանին՝ լինի Միհրան Պողոսյանը, Միքայել Հարությունյանը և այլն: Հիմա ի՞նչ ակնկալիքներ ունեք Արամ Հարությունյանի մասով:
– Ես կանխատեսում եմ, որ Ռուսաստանն իրեն էլ չի տալու: Ովքեր կապված են Սերժ Սարգսյանի հետ, Ռուսաստանը չի տալու:
– Ձեզ հետ կապված մյուսների գործով ի՞նչ նորություններ կան՝ Սուրիկ Խաչատրյան, Վարդան Այվազյան:
– Ես արդեն ասել եմ, որ մեկ տարուց ավելի է, որ դատախազությունը Սուրիկ Խաչատրյանի հետ կապված ոչ մի պատասխան չի տալիս ինձ: Որոշ ժամանակ անց ուզում եմ մամուլի ասուլիս կազմակերպել և իմ բողոքները հայտնել դատախազից, որը թերանում է իր աշխատանքում: Ես որոշ գործերի հետ կապված գրություններ եմ ուղարկել թե՛ դատախազին, թե՛ վարչապետին, կարծեմ՝ վարչապետի կողմից էլ են գրությունը հասցեագրել դատախազին, սակայն մինչ օրս լռություն է տիրում:
– Դուք ընդհանրապես ակնկալիքներ ունե՞ք, որ այս գործերը բացահայտվելու են, և ձեր վնասները փոխհատուցվելու են:
– Այո, ես ակնկալիք ունեմ, ասում են՝ հույսը վերջում է մահանում:
– Իսկ ինչո՞ւ էիք մարդ վարձել, որ պարզե՞ք Արամ Հարությունյանի գտնվելու վայրը:
– Նախ՝ իր ունեցվածքն էլ էր ինձ հետաքրքրում: Եթե մարդը մի տեղից մյուս տեղն է գնում, գնում է իր ունեցվածքի հետևից: Ես պարզեցի, որ Լիոնում մեքենաների մեծ ծառայություն ունի, իսկ Լոնդոնում էլ տուն ունի:
– Սամվել Մայրապետյանից նույնպե՞ս լուր չկա:
– Ես ասել եմ, որ Սամվել Մայրապետյանն այլևս չի վերադառնա Հայաստան: Հիմա որ ինքը գնաց, արդեն շատ լավ վիճակում էր: Մի անգամ իրեն դուրս տարան շատ ծանր վիճակում, լավ վիճակում եկավ, իսկ երկրորդ անգամ իրեն պարզապես փախցրին:
