Պետական ապարատի կողմից հեղափոխությանը դիմադրելու թեմային ես Կապանում անդրադարձել եմ կոնկրետ օրինակով՝ Քաղավիացիայի վարչության օրինակով, եւ դրա կոնկրետ հետեւանքները մենք տեսել ենք: Այս մասին այսօր՝ մայիսի 16-ին, իր մեծ ասուլիսի ժամանակ նշեց ՀՀ վարչապետ Նիկոլ Փաշինյանը:
«Ընդհանուր առմամբ, ես չէի ուզենա անձնավորել: Վերջին անգամ ԱԺ-ում երբ խոսել եմ, խոսել եմ մասնավորապես, դիվանագիտական կորպուսի մասին, արտաքին քաղաքականության պատկերացումների մասին: Եթե այս հարցին կեսկատակ վերաբերվենք, կարող ենք ասել Մարկ Տվենի հայտնի պատմությամբ, որ պետական կառավարման համակարգի կեսը դիմադրում է: Անեկդոտ կա. որ երբ Մարկ Տվենը գրում է, որ պաշտոնյաների կեսը կաշառակեր է, նրան դատի են տալիս, եւ դատարանը նրան պարտավորեցնում է հերքել ասածը: Եվ նա հերքում է գրում, որ պաշտոնյաների կեսը կաշառակեր չեն: Հիմա ես ասում եմ՝ պետական կառավարման համակարգի կեսը դիմադրում է հեղափոխությանը եւ բարեփոխումներին, մյուս կեսը չի դիմադրում, այլ օգնում է: Եթե բարձրաստիճան պաշտոնյաների շրջանում լինի կոնկրետ դրսեւորում, դա չի հանդուրժվի: Այստեղ ավելի շատ ներքին, խուլ դիմադրության մասին է»,-հայտարարեց վարչապետը:
