Ճգնաժամը հենց նրանով է ճգնաժամ, որ բոլորս տուժելու ենք, հայտարարել է վարչապետ Նիկոլ Փաշինյանը ֆեյսբուքյան ուղիղ եթերի ընթացքում, նշելով, որ խոսքը վերաբերում է նաև կառավարության քաղաքական վստահելիությանը: Դա առանցքային հայտարարություն է, քանի որ վկայում է, որ կառավարությունը փաստորեն դիտարկում է կորոնավիրուսային ճգնաժամի պայմաններում քաղաքական վստահելիության կորուստ: Այդ հանգամանքը առաջացնում է հետաքրքիր հարցեր հետկորոնավիրուսային քաղաքական իրողությունների առնչությամբ:
https://www.youtube.com/watch?v=ARooYyXxhrI&feature=emb_title
Մասնավորապես, հայտնի է օրինակ սահմանադրական հանրաքվեի հետաձգման պարագան և հարց է, թե ճգնաժամի պայմաններում կառավարության քաղաքական վստահելիության ընդհուպ վարչապետի մակարդակով արձանագրվող կորստի հանգամանքը ինչ ազդեցություն կունենա հանրաքվեի հարցում դիրքորոշման վրա: Իհարկե առանձին հարց է, թե արդյո՞ք բանը կհասնի հանրաքվեի, թե՞ կառավարությունը անգամ թուլացնելով սահմանափակումները, այդուհանդերձ կպահպանի արտակարգ դրության ռեժիմը, ինչը կնշանակի, որ դեռ երկար ժամանակ չի լինի վերադարձ քաղաքական այդ օրակարգին:
Համենայն դեպս, վարակի հանգամանքը կառավարությանը տալիս է քաղաքական այդ քայլի հնարավորություն, ռացիոնալ հիմք: Բանն այն է, որ արտակարգ դրության ռեժիմը կառավարությանը տալիս է անհրաժեշտության դեպքում օպերատիվ արտակարգ քայլերի, միջոցառումների հնարավորություն, ու անգամ տնտեսության և շարժի սահմանափակումների իսպառ վերացման պայմաններում դա գործիք է, որ կառավարությանը կթողնի անհրաժեշտ պահին շատ արագ սահմանափակում վերականգնելու հնարավորություն: Եթե կա քաղաքական վստահելիության նվազման խնդիր, ապա արտակարգ դրության ռեժիմի պահպանումը կառավարող մեծամասնության համար կարող է դառնալ նաև քաղաքական անվտանգության որոշակի բարձիկ:
Իհարկե շատ բան կախված է այն հանգամանքից, թե որքան է լինելու վստահության կորուստը: Այն, որ կլինի, թերևս անխուսափելի է, սակայն գուցե կասկած չկա, որ այդուհանդերձ վստահությունը չի իջնի այսպես ասած կրիտիկականի մակարդակի: Հարցն այն է, որ կոնկրետ հանրաքվեի պարագայում անհրաժեշտ է որոշակի այլ թվաբանություն, քան օրինակ զուտ ընտրական գործընթացը: Եվ այստեղ է, որ վստահության կորստի չափը որևէ խնդիր չլինելով ընտրական գործընթացի համար, կարող է խնդրահարույց լինել ՍԴ դատարանակազմին առնչվող հանրաքվեի պարագայում: