Ինչպես ավելի վաղ գրել էինք, մարտի 26-ին Ախալքալաքի «Գոլդ» սրճարանի մոտակայքում վեճ է ծագել Ախալքալաքի նախկին ոստիկանապետ Սամվել Պետրոսյանի և պատգամավոր Հենզել Մկոյանի և կողմերի համակիրների միջև։ Հնչել են կրակոցներ: Հենզել Մկոյանը պնդում է, որ վեճը հրահրել է Սամվել Պետրոսյանը։
Վերջինիս մեղադրանք է առաջադրվել Վրաստանի ՔՕ 236-րդ հոդվածի 3-րդ և 4-րդ մասերով, 239-րդ հոդվածի 2-րդ և 3-րդ մասով:
Հիմա Սամվել Պետրոսյանի համակիրները ստորագրահավաք են կազմակերպել Հենզել Մկոյանին պատգամավորական մանդատից զրկելու նպատակով:
Պատգամավորի խոսքերով՝ այդ ստորագրությունները ոչ մի ուժ չունեն: Նախկին ոստիկանապետը, ըստ նրա, սա կազմակերպել է, որ իրեն բանտից ազատ արձակեն։ «Մեր երկրի Սահմանադրության մեջ նման բան չկա, որ կարելի է ստորագրություններով մարդուն պատգամավորական մանդատից զրկել: Էն, որ ասում են՝ մարդը փրփուրներից է կախվում, նախկին ոստիկանապետն էլ փրփուրներից է կախվել»,- ասաց Մկոյանը:
Նա պատմեց, որ նախկին ոստիկանապետը բռնվել է, քանի որ իր վրա երեք անգամ կրակել է։ «Սամվել Պետրոսյանը հիմա բռնված է, որովհետև ուղիղ իմ վրա կրակել է, մարտի 26-ին 3 անգամ կրակել է իմ վրա, և եթե այդ պահին իր ատրճանակի մեջ փամփուշտը չլռվեր, ինձ կսպաներ ինքը: Իրենք արդեն 25 օր է, որ ստորագրությունները հավաքում են, ու շատ քիչ են հավաքել: Կարող է մի 100-200 ստորագրություն հավաքեն:
Իսկ միջադեպի մյուս կողմը, որ իմ եղբոր 18 տարեկան որդին է, իր ընկերները արդեն 17 հազար ստորագրություն են հավաքվել: Բայց ստորագրություն հավաքելը սկսվել է նախկին ոստիկանապետի կողմից»,- նշեց պատգամավորը:
Հենզել Մկոյանի խոսքերով՝ նախկին ոստիկանապետը միշտ էլ սադրիչ է եղել. «Եթե այդպիսին չլիներ, ինքը 18 տարեկան տղային, որ իր թոռան տարիքին է, չէր հայհոյի: Ամեն ինչ դրանից է սկսվել: Ընդ որում` դա միտումնավոր է արել: Երբ դեպքը պատահական է լինում, ինչ-որ տեղ կարելի է հասկանալ, բայց երբ 68 տարեկան տղամարդը 50 տարի իրենից փոքր տղային հայհոյանք է տալիս ընկերների մոտ, ես համարում եմ, որ այդպիսի մարդիկ պետության համար վտանգավոր են:
Դրանից հետո, երբ երիտասարդները հավաքվել էին, ես գնացի, հանգստացրի, բերեցի տուն, դրանից մեկ րոպե հետո ինքը եկավ, իր տղային ասաց՝ դու գնա ու 3 անգամ իմ կողմը ուղիղ կրակեց: Այդ զապիսները բոլորը կան»:
