Համախառն ներքին արդյունքի կամ տնտեսական ակտիվության ցուցանիշի ներկա «աճի» պայմաններում իշխանությունները չեն կարողանա սպասարկել արտաքին պարտքը. «Առաջին լրատվական»-ի հետ զրույցում նման գնահատական տվեց ՀՀ նախկին վարչապետ Հրանտ Բագրատյանը:
Նրա կարծիքով, իշխանությունը կփորձի նոր պարտք վերցնել, որպեսզի փակի հին պարտքը, և եթե այսօրվա պաշտոնավարողները իշխանության մնան՝ կանեն դա: Հնարավոր է նաև՝ իշխանությունը փորձի պարտքի սպասարկումը հետաձգել, բայց փոխարենը միջազգային կառույցները ինչ-որ բան կուզեն:
Հարցին՝ ինչի՞ հիման վրա է իշխանությունը հայտարարում, թե ոչ մի խնդիր չկա պարտքի սպասարկման տեսակետից, Հ. Բագրատյանը պատասխանեց. «Ոչ մի բանի վրա համոզված չէ: Ասում է, որ շարունակի իր կյանքը: Ունենք ամենավատ տնտեսությունը, ամենավատ կառավարությունը, ամենավատ վարչապետը, որոնք շարունակում են պաշտոնավարել»:
Նշենք, որ, 2011 թ. հունվարի 31-ի դրությամբ, ՀՀ արտաքին պարտքը 3 մլրդ 443 մլն դոլար է: Արտաքին պարտքը կազմում է ՀՆԱ-ի շուրջ 43%-ը: Այս տարի կառավարությունը նախատեսում է պարտքի սպասարկման համար ծախսել 90 մլն դոլար:
