Ազգային ժողովը փետրվարի 6-ին Սահմանադրության 213 հոդվածի փոփոխության նախագծի առաջին ընթերցման օրակարգով արտահերթ նիստ էր հրավիրել։ Նախագծով առաջարկվում է փաստաթղթի ուժի մեջ մտնելու պահից դադարեցնել մինչև Սահմանադրության 7-րդ գլխի ուժի մեջ մտնելը նշանակված ՍԴ անդամների պաշտոնավարումը։
ԱԺ «Իմ քայլը» խմբակցությունն առաջին ընթերցմամբ չընդունեց ՍԴ դատավորների պաշտոնավարումը դադարեցնելու՝ իր կողմից ներկայացված նախագիծը՝ առաջարկելով այն դնել հանրաքվեի։ Սահմանադրության 202-րդ հոդվածի 3-րդ կետի ուժով ԱԺ-ին տրված լիազորությամբ «Իմ քայլն» առաջարկեց քվեարկության դնել այդ նախագիծը համաժողովրդական հանրաքվեի ներկայացնելու մասին որոշումը։
Քաղաքագետ Սարո Սարոյանն, անդրադառնալով ԱԺ-ի իշխանական խմբակցության նախաձեռնությանը, «Առաջին լրատվական»-ի հետ զրույցում հիշեցրեց, որ արդեն հրապարակվել է սահմանադրական փոփոխությունների գործընթացի մեկնարկի մասին, իսկ սահմանադրական փոփոխությունների հանձնաժողովն էլ ձևավորման փուլում է։
«Ստացվում է, որ մենք իրար զուգահեռ երկու գործընթաց ենք նախաձեռնելու, որոնք կապված են Սահմանադրության հետ։ Իսկ այս շտապողականության պատասխանը ոչ ոք չի տալիս։ Ի՞նչն է պատճառը, որ սահմանադրական փոփոխությունները լուծելիս շտապում, առաջ են ընկնում։ Դա արդեն նորմալ չէ, ինչի հետևանքներն ի հայտ են գալու։ Այսինքն՝ կառավարող ուժը, ցուցաբերելով շտապողականություն և փորձելով լուծել խնդիրը ամեն գնով, անընդհատ իրեն գցում է տարբեր թակարդների մեջ և քաղաքական առումով պարտություններ կրում։ Իրենք պարբերաբար խնդիրներ են դնում իրենց առջև, հերոսաբար փորձում լուծել, չի ստացվում, հետո նոր խնդիրներ են դնում, նորից չի ստացվում։ Այսօր երկրում կա նոր Սահմանադրություն ընդունելու խնդիր, որն էլ իր հերթին կկարգավորի երկրի ինստիտուտների դերը»,- կարծում է քաղաքագետը։
Սարո Սարոյանը նկատում է, որ չպետք է առաջնորդվել «որտեղ հրդեհ է բռնկվում, գնալ-մարելու» սկզբունքով, ինչը խաթարում է ամբողջ քաղաքական համակարգի բնականոն գործունեությունը։
«Պետական կառավարման համակարգի, բոլոր ինստիտուտների բարեփոխման միջոցով կարող են լուծվել խնդիրները»,- ասաց նա։
Դիտարկմանը, թե իշխանություններին մեղադրում են բարեփոխումներն ուշացնելու, դանդաղկոտության համար, Սարո Սարոյանն արձագանքեց. «Բայց փաստ է, որ ուշացրել են բարեփոխումները։ Մոտ երկու տարի է անցել հեղափոխությունից, բայց երկու ամիս առա՞ջ հասկացան, որ պետք է փոխվի Սահմանադրությունը։ Պնդումներ են անում, որ կառավարման մոդելի փոփոխություն չի լինելու, անգամ իրենք են ասում, որ փոփոխությունները միայն դատական իշխանությանն են վերաբերելու։ Պետք է օրենսդիր, դատական, գործադիր իշխանությունների հետ կապված խնդիրնե՞ր ի հայտ գան, որ իրենք հասկանան, որ Սերժ Սարգսյանի հագով կարած Սահմանադրությունը ոչ մի պարամետրով չի համապատասխանում մեր երկրին»։
