Ապրիլյան քառօրյա պատերազմին նվիրված «Հարսանիք թիկունքում» ներկայացումը, որը բեմադրվել է դրամատուրգ Անահիտ Աղասարյանի «Ապրիլ և ապրել» պիեսի հիման վրա և գրվել է Գյումրու դրամատիկական թատրոնի պատվերով, շուրջ երկու տարի ներկայացվել է լեփ-լեցուն դահլիճներում՝ թե՛ Հայաստանում, թե՛ արտասահմանում, և շուտով կէկրանավորվի:
«Առաջին լրատվական»-ի հետ զրույցում ներկայացման էկրանավորման ռեժիսոր, դերասան Արշալույս Հարությունյանը նշեց, որ այս ներկայացումը լեգենդար ցուցանիշներ է ապահովել՝ թե՛ իր հուզական դաշտով, թե՛ հանդիսատեսի թվով, և՛ թե ներկայացումների քանակով. «Ցանկություն կա ունենալ նաև ֆիլմային տարբերակը: Նպատակը հանդիսատեսի ավելի լայն շրջանակ ընդգրկելն է, Սփյուռքին և բոլորին ավելի հասանելի դարձնելն է: Ժապավենի վրա այն ավելի երկար կյանք կունենա»:
Արշալույս Հարությունյանի խոսքով՝ դերասանական կազմի փոփոխություն չի նախատեսվում, դեկորատիվ փոփոխություններ կլինեն, բայց ամեն ինչ արվում է, որ ներկայացման համուհոտը չկորչի:
«Մեր տղերքը ապրիլյանի օրերին ոչ թե հրաման էին կատարում, այլ որոշում. նրանք որոշում կայացրին, որ պետք է կանգնեն ու պաշտպանեն իրենց հայրենի հողը: Նրանք ամեն ինչ գիտակցաբար են արել»,- նկատեց ռեժիսորը: Նրա դիտարկմամբ՝ չի կարելի ասել, որ ապրիլյան պատերազմին երկիրն անպատրաստ էր:
«Ապրիլյան պատերազմը սթափեցրեց մեզ, արթնացրեց մեր քնած զգայարանները և հասկացրեց, որ չի կարելի բթանալ, չի կարելի հղփանալ… Միշտ պետք է ուժեղանալ՝ գիտակցելով, որ հակառակորդը անընդհատ համալրում է իր արսենալը, և ամեն ինչ պետք է անել դրան դիմակայելու համար»:
Մանրամասն՝ տեսանյութում:
