Վերջերս կառավարության հաստատած 2012-2014 թթ. միջնաժամկետ ծախսային ծրագրով նախատեսվում է երեխայի ծննդյան միանվագ նպաստի չափի ավելացում. 3-րդ և 4-րդ երեխայի ծննդյան դեպքում պետք է տրվի 1 մլն դրամ, 5-րդ և յուրաքանչյուր հաջորդ երեխայի դեպքում՝ 1.5 մլն դրամ: Այս ծրագիրը կսկսի իրագործվել 2014-ից: Նկատենք, որ Ռուսաստանում նման ծրագրի ներդրումը ոչինչ չփոխեց և տարեկան բացասական սալդոն շարունակում է մնալ 1 մլն մարդ:
«Առաջին լրատվականի» հետ զրույցում ԱԺ սոցիալական հարցերի մշտական հանձնաժողովի նախագահ Հակոբ Հակոբյանը կարծիք հայտնեց, որ Ռուսաստանի մոտեցումները ժողովրդագրական խնդիրների լուծման հետ կապված այլ են, Հայաստանինը՝ այլ, և պետք է հաշվի առնել, որ Ռուսաստանի հնարավորություններն այդ հարցում շատ ավելի մեծ են, քան ՀՀ հնարավորությունները՝ մեր ունեցած բյուջեի սահմաններում: Հ.Հակոբյանը նշեց, որ ընդհանրապես ծրագրերը մշակում են, ապա դրանց զարգացման ընթացքում հաշվարկվում է արդյունավետությունը, և որոշ ժամանակ անց, գնահատելով եղած արդյունավետությունը, կատարվում են անհրաժեշտ փոփոխություններ:
«Մեր համակարգն ապացուցել է իր արդյունավետությունն այսօրվա համար, իսկ վաղվա համար՝ կյանքը ցույց կտա»,- նշեց ՀՀԿ-ական պատգամավորը՝ որպես ապացույց բերելով երեխաների բնական աճը՝ ՀՀ-ում ծնելիությունը 2001 թ.-ին 32 հզ. է եղել, իսկ 2010-ին՝ 45 հզ.:
Հավելենք, որ այսօր առաջին և երկրորդ երեխայի համար միանվագ տրվում է 50 հզ. դրամ, 3-րդ երեխայի համար՝ 430 հզ. դրամ:
