Երեկ պարզվել է, որ Հովիկ Աբրահամյանի կառավարության Ազգային ժողով ներկայացրած օրինագիծն իրականում ոչ թե առկախում է կենսաթոշակային կուտակային համակարգի պարտադիր բաղադրիչը, այլ էլ ավելի է խճճում հարցը կամ ընդամենը հարցը խճճելու նոր միջոց է: Ինչի՞ մասին է խոսքը:
Բանն այն է, որ Հովիկ Աբրահամյանը օրեր առաջ հայտարարեց, որ օրինագիծ պետք է մշակվի, ըստ որի կասեցվում են պարտադիր վճարումներ չկատարելու համար տույժերի կիրառումը: Իսկ երկու օր առաջ էլ կառավարությունում Հովիկ Աբրահամյանը հայտարարեց, որ դե ֆակտո կասեցվում է պարտադիր բաղադրիչը այս օրենքով:
Սակայն, ահա, երեկ ԱԺ-ի սոցիալական հարցերով հանձնաժողովում օրենքի քննարկումից պարզ է դարձել, համենայնդեպս ըստ հանձնաժողովի ՀՀԿ-ական նախագահ Հակոբ Հակոբյանի մեկնաբանության, որ պահումները այնուամենայնիվ պարտադիր պետք է կատարվեն աշխատավարձերից, իսկ ահա փոխանցում գործատուն կարող է և չկատարել:
Այսինքն` ըստ էության բացահայտվել է Հովիկ Աբրահամյանի կառավարության շուստրիությունը, որով փորձ է արվել մի կողմից հասարակության մոտ լավամարդ դուրս գալ և կանխել լարվածությունը սոցիալական բողոքների հետ կապված, իսկ մյուս կողմից էլ` գործատուներին հերթական անգամ գցել են խուճապային, խառնաշփոթ իրավիճակի մեջ, երբ մարդիկ այս օրենքից հետո էլ սկսելու են իրար հարցնել, թե ի վերջո` պահենք, թե չպահենք:
Այն, որ Հովիկ Աբրահամյանի կառավարությունից ավելին սպասելն, իհարկե, միամտություն կլիներ` ոչ ոքի համար գաղտնիք չէ, բայց որ Աբրահամյանը այս աստիճանի բաց աճպարարության կարող էր դիմել` իհարկե անսպասելի է: Եվ երևի թե հենց սրա համար էլ նորանշանակ վարչապետը վերջին օրերին փորձում էր հասարակությանը զարմացնել իր քայլերով՝ գնալ ու «ԴԵՄ ԵՄ» շարժման հանրահավաքին ընդառաջ ներկայանալ ցուցարարներին, երեկ էլ գնալ ու այսպես ասած` անսպասելիորեն ներկայանալ ոչ իշխանական հարազատների նիստին:
Ըստ երևույթին, Հովիկ Աբրահամյանի համար այս ամենը, այսպես ասած, շեղող մանևր էր, որպեսզի ուշադրություն գրավելով` ըստ էության հասարակության ուշադրությունը շեղեր կուտակայինի մասին իր կառավարության հեղինակած շուստրիությունից: Սակայն, ինչպես ասում են` փորձված աղվեսը երկու ոտքով է թակարդն ընկնում, և Հովիկ Աբրահամյանի կառավարությունն, ըստ էության, կարելի է ասել` ծակվեց դեռ չփչված, այսինքն` դեռ լրիվ չձևավորված:
Լուսանկարը՝ Photolure-ի
