«Սասնա ծռեր» կուսակցության անդամները հայտարարել են, որ 2020-ին հանդես են գալու իբրև արմատական ընդդիմություն։ Նրանք օրակարգում ունենալու են արտահերթ ընտրությունների անցկացումը։ Քաղաքագետ Ռոբերտ Ղևոնդյանը հայտարարության մեջ վտանգ չի տեսնում։ Քաղաքագետը չի կարծում, թե արմատական ընդդիմություն ասելով «Սասնա ծռերը» նկատի ունեն որևէ ահաբեկչական գործողություն․ «Ամենայն հավանականությամբ՝ «Սասնա ծռերը» փորձում են լցնել այն վակուումային հատվածը, որը կապ չունի նախկինների հետ և որոշակի դժգոհություն ունի ներկա իշխանություններից։ Այդ պատճառով «Սասնա ծռերը» իրենք իրենց հեռացնում են ներկա իշխանությունից, քանի որ նրանք անընդհատ հայտարարում են, որ պաշտպանում են Նիկոլ Փաշինյանին։ Եվ քանի որ այսօր նախկինների այն հատվածը, որն իրեն ընդդիմություն է հռչակել, որևէ հաջողություն չունի ժողովրդի մոտ և չի կարողացել որոշակի այնպիսի դիրք գրավել հասարակության մեջ, որը հնարավոր կլինի հակակշռել ներկա իշխանություններին, Սասնա ծռերը փորձում է այդ հակակշռելու դերը կատարել, սակայն բոլորովին այլ դիրքերից, որը ես չեմ համարի ահաբեկչական»,-ասաց քաղաքագետը։
Ղևոնդյանի խոսքով՝ կա վակուում, և հասարակությունը կարիք ունի այնպիսի թարմ ուժերի, որոնք կապ չեն ունենա նախկինների հետ և որոնք քննադատում են իշխանություններին շատ քայլերի համար։
Հարցին, թե ինչու է ձգձգվում այդ բևեռի ձևավորումը, քաղաքագետը մի քանի պատճառ նշեց․պատճառներից մեկն այն է, որ նախկին իշխանությունների հատվածը փորձում է իր հնարավորությունների սահմաններում թույլ չտալ երկրում երրորդ բևեռի ձևավորումը, քանի որ դա չի բխում իրենց շահերից՝ հաշվի առնելով, որ նախկինները հասարակության մեջ չունեն սոցիալական որևէ լուրջ շերտի աջակցություն, երրորդ բևեռի ձևավորումը կարող է նրանց ընդհանրապես մղել լուսանցքից դուրս։ Իսկ այսօր քանի որ չկա այդ երրորդ բևեռը, կա մեկ բևեռ՝ մեծ լեգիտիմություն ունեցող, իշխանությունն է և կա գոնե համակարգված միայն որոշակի հատված, որը բավական փոքր հատված է, սակայն միակ համակարգվածն է, հենց նախկիններ են։ Մյուս ուժերը «ցաքուցրիվ» են, դա որոշակի հնարավորություն է տալիս նախկիններին որոշ հարցերում համակարգվածություն ցուցաբերելով՝ հակակշռել իշխանությանը, ինչը իրականում չի համապատասխանում ժողովրդավարական հասարակությունում իշխանություն-ընդդիմություն գործընթացների տրամաբանությանը»։
Մյուս պատճառը, ըստ նրա, այն է, որ երրորդ բևեռը որոշակիորեն չի կարողանում համակարգվել և հավաքել համախոհների բանակ և այդ համախոհների միջոցով ստեղծել այդ իրական բևեռը, որը կկարողանա լրացնել այդ վակուումը քաղաքական դաշտում․ ««Սասնա ծռերը» դա փորձում են անել, սակայն հաշվի առնելով որոշակի հանգամանքներ՝ կապված Սասնա ծռերի հանրային ընկալման հետ, հնարավոր է նրանց մոտ էլ չհաջողվի։ Իսկ եթե նրանց մոտ հաջողվի և նաև այլ ուժերի մոտ էլ հաջողվի, օրինակ՝ Արման Բաբաջանյանի մոտ, որը նման միտումներ է ցույց տալիս, կառաջանա երրորդ բևեռ, չի բացառվում նաև չորրորդ բևեռ, ինչը ևս Հայաստանին ժողովրդավարական առումով միայն օգուտ կբերի»։
