«Կառավարել մի մեծ ապարատ, որը 20 տարի գործել է մի տրամաբանությամբ, և դու պետք է փոխես այդ տրամաբանությունը՝ շատ դժվար է: Կառավարման համակարգը ունի իր էներցիան: Ավելին՝ կա գործող Սահմանադրություն՝ լավ, թե վատ, որի հետ պետք է հաշվի նստել: Կան օրենքներ, օրենսգրքեր, ընթացակարգեր, ռազմավարություններ, միջազգային ստանձնած պարտավորություններ և այլն, որոնց հետ պետք է հաշվի նստել: Իներցիան պիտի ապահովես, որ չընդհատվի կառավարումը, և ընթացքում պետք է ժամանակ գտնես՝ գիտակցելու, թե ինչ ես ուզում, ինչպիսի պետություն ես ուզում, ինչպիսի քաղաքացի ես ուզում, և գտնել համապատասխան մասնագետների, որոնք դա կընդունեն: Ուզում եմ ասել՝ հսկայական աշխատանք ենք պահանջում երկու տարվա իշխանությունից, ինչը օբյեկտիվորեն երևի թե անհնար էր»,- «Առաջին լրատվական»-ի հետ զրույցում ասաց «Մխիթար Սեբաստացի» կրթահամալիրի կառավարման խորհրդի նախագահ, հանրային կապերի մասնագետ Արամազդ Ղալամքարյանը:
Նրա խոսքով՝ իշխանությունը տվել է նաև ուղենիշներ, սակայն հարց է, թե ինչքանով են դրանք հստակ և հասու հասարակությանը. «Կարծում եմ, որ վարչապետը իր մտքում ունի իր պատկերացրած Հայաստանը 2050 թվականին: Սակայն վստահ չեմ՝ արդյոք իր թիմն ունի՞, թե՞ ոչ, կիսո՞ւմ է, թե՞ ոչ, որովհետև այդ թիմը շատ խայտաբղետ է՝ սկսած ֆրակցիայից, վերջացրած նախարարներով, փոխնախարարներով ու մարզպետներով»:
Հարցազրույցն ամբողջությամբ՝ տեսանյութում: