Ադրբեջանի նախագահ Իլհամ Ալիևը կարծում է, որ Եվրամիությանն անդամակցելը երկրի համար անհնար է, հաղորդում է «Ինտերֆաքս»-ը:
«Ես գտնում եմ, որ մենք ձեռնարկել ենք մեր քայլերը եվրոինտեգրման ուղղությամբ, հետագա քայլերի անհրաժեշտություն չկա, և դրանք կլինեն անարդյունք»,- հայտարարել է պետության ղեկավարը:
Նա հիշեցրել է, որ մի շարք բալկանյան երկրներ, հանուն Եվրամիությանն անդամակցության, գնացին իրենց համար ցավալի պայմանների կատարման ճանապարհով, բայց չստացան այն: Ալիևը նշել է նաև Թուրքիայի օրինակը: Նա կարծում է, որ այդ երկրի համար Եվրամիությանն անդամակցությունը փակ է, քանի որ Թուրքիան մահմեդական երկիր է:
«Այսպես կոչված «ընդդիմությունը» փողոց է դուրս գալիս ԵՄ դրոշներով: Նրանք ցանկանում են, որ Ադրբեջանի ճակատագիրը որոշվի Բրյուսելու՞մ: Մենք չենք կարող մեր ճակատագիրը հանձնել այլոց: Մենք ունենք մեր սեփական պատմությունը, մեր արժեքները»,- եզրափակել է Ալիևը:
«Արևելյան գործընկերությունը» Եվրամիության ծրագիրն է, որի հիմնական հռչակված նպատակը Եվրամիության ինտեգրացիոն կապերի զարգացումն է Ադրբեջանի, Հայաստանի, Բելառուսի, Վրաստանի, Մոլդովայի և Ուկրաինայի հետ:
