Հայաստանի Հանրապետության պատմության ամենանշանավոր պոպուլիստը՝ Վազգեն Մանուկյանը, կառավարությանը մեղադրում է պոպուլիզմի մեջ։ Պոպուլիզմի և անպատասխանատվության պատճառով Վազգեն Մանուկյանը ժամանակին ոչ միայն չի կարողացել տեր կանգնել ժողովրդի կողմից ստացված քվեներին, այլ նաև պոպուլիստական հայտարարությունների միջոցով մարդկանց դրդել է բռնության, որի հետևանքով որոշ ցուցարարներ գրավեցին Ազգային ժողովի շենքն ու ծեծի ենթարկեցին խորհրդարանի ղեկավարությանը։
Ահա այսպես Ղարաբաղ կոմիտեի գաղափարախոսն ու Արցախյան շարժման ակտիվ դերակատարներից մեկն ընդամենը մի քանի տարիների ընթացքում փոխակերպվեց քաղաքական շարքային հաճախորդի, որը տարատեսակ ծառայություններ է մատուցում պատրոնին: Իհարկե այնպես չէ, որ Մանուկյանն ամբողջ կյանքում երազել է շարքային հաճախորդ դառնալ, ընդհակառակը նա այդ կարգավիճակում հայտնվել է պոպուլիզմի և անպատասխանատվության պատճառով։ Ավելին՝ նա իր քաղաքական տերերին ծառայել ու նրանց հանցագործությունները արդարացրել է պոպուլիստական հմայքով և ինքնավստահությամբ։
Նա չէր կարողանում թաքցնել հրճվանքը 1999 թ. հոկտեմբերի 27-ի ոճրագործությունից հետո՝ հայտարարելով, թե կատարվածն ընդամենը մի խումբ ռոմանտիկների ձեռքի գործն է: Իսկ վերջերս պարզվեց, որ Վազգեն Մանուկյանը ահաբեկչությունից մի քանի օր առաջ հանդիպել է այդ ռոմանտիկների հետ և ինչ-որ ռոմանտիկ խորհուրդներ է տվել, ինչի հետևանքով էլ կատարվել է այն, ինչ-որ կատարվել է: Մի՞թե սառնասիրտ մարդասպաններին ռոմանտիկ անվանելը պոպուլիզմ չէ։ Իրականում դա ավելին է, քան պոպուլիզմը, այս պարագայում ավելի շատ գործ ունենք հանցագործ ու քայքայիչ պոպուլիզմի հետ, որի հեռահար նպատակն էր օգտվել ոճրագործության հետևանքով առաջացած նպաստավոր իրավիճակից և քաղաքական հարություն առնել։
Իսկ հիմա քայքայչ պոպուլիզմի մեծ փորձ ուենցող այս մարդը կառավարությանը մեղադրում է պոպուլիզմի մեջ, առանց հասկանալու, որ պոպուլիզմը բնական քաղաքական գործիք է, որից օգտվում են աշխարհի բոլոր քաղաքական գործիչները։ Խնդիրը մեկն է․ պոպուլիզմի գործադրման պայմանը քայքայիչ և հակապետական չլինելն է։ Ինչպես տեսնում ենք Մանուկյանը խախտել է այս կարևորագույն սկզբունքը և իր քայքայիչ պոպուլիզմով մեծագույն հարված է հասցրել ու հասցնում է Հայաստանի հանրապետությանը։