Չինաստանի կրթական համակարգը կարող է չդիմանալ 2008-ին ծնելիության բարձր մակարդակով պայմանավորված աշակերտների հոսքին: Փորձագետների այս կարծիքը բերում է New York Times թերթը:
2008-ին միայն Պեկինում 10 000 երեխա ավել է ծնվել, քան նախորդ մի քանի տարում: Պարբերականը նշում է, որ Չինաստանում ընդունված է երեխաների ծնունդը ծրագրել «երջանիկ» տարիներին, իսկ «8» թիվը, ըստ տեղի հավատալիքների, հաջողություն է բերում: Նունանման ժողովրդագրական պոռթկում եղել է նաև 2012-ին՝ չինական օրացույցով Վիշապի տարում: Շատ ընտանիքներ լավ նշան են համարել Պեկինի Օլիմպիադան:
Սակայն New York Times-ը նշում է, որ «օլիմպիական սերունդը», ըստ ամենայնի, զգալի խնդիրների կբախվի միջոցների սահմանափակության պատճառով այնպիսի ոլորտներում, ինչպիսիք են կրթությունը, առողջապահությունը և աշխատանքի տեղավորվելը:
Չինաստանում շատ կարևոր է համարվում լավ կրթությունը, սակայն կոռումպացված պետական համակարգը դժվարացնում է լավ կրթություն ստանալը: Երեխային լավ դպրոցում տեղավորելու համար չինացի ծնողները 8-48 000 դոլար կաշառք են տալիս, իսկ լավագույն ուսումնական հաստատություններում տեղերի համար մրցույթը շատ մեծ է: Պեկինում այս տարի առաջին դասարան կգնա 176 000 երեխա՝ մոտ 2 անգամ ավել, քան 5 տարի առաջ:
Չինաստանի իշխանությունները, սակայն, վստահեցնում են, որ դպրոցներում բոլորի համար տեղ կլինի, իսկ Պեկինի ղեկավարությունը հայտնել է, որ ուշադիր կհետևի աշակերտների հավաքագրմանը և կսահմանափակի ուսումնական հաստատությունների լիազորությունները: Բացի դրանից՝ երկրի իշխանությունները մի շարք միջոցներ են ձեռնարկել դպրոց ընդունվելը հեշտացնելու համար:
