Ազգային ժողովի պատգամավոր Տիգրան Ուրիխանյանը «Հայաստանի Հանրապետության ընտրական օրենսգրքում լրացում կատարելու մասին» նախագիծ է ներկայացրել, որով առաջարկում է սահմանված նմուշի քվեաթերթիկն անվավեր համարել, եթե այն ծալված է անհամաչափորեն, և տվյալ ծալվածքն ակնհայտորեն հանդիսանում է տվյալ քվեաթերթիկը տարբերակելու միջոց:
Կառավարությունը, սակայն, բացասական եզրակացություն կտա այս նախաձեռնությանը չորքշաբթի օրվա նիստում: «Գտնում ենք, որ տեղամասային ընտրական հանձնաժողովի լիազորությունները չեն կարող մեկնաբանվել և կիրառվել այնքան լայն, որ հանգեցնեն ընտրողների կամքի արտահայտության խեղաթյուրմանը, մինչդեռ՝ ներկայացված նախագծով առաջարկվում է մի մոտեցում, որը պարունակում է հայեցողության ոչ հստակ սահմաններ: Մասնավորապես՝ նախագծով նախատեսված չեն այն չափանիշները, որոնց առկայության դեպքում քվեաթերթիկը կհամարվի անհամաչափորեն ծալված կամ ծալվածքը կհանդիսանա քվեաթերթիկը տարբերակելու միջոց: Իսկ նման չափանիշների բացակայությունը (որոնք գործնականում սահմանելը, մեր կարծիքով, հնարավոր չէ) կհանգեցնի «անհամաչափորեն ծալված», «ակնհայտորեն հանդիսացող» և «քվեաթերթիկը տարբերակելու միջոց» եզրույթների հայեցողական մեկնաբանմանը, քանի որ հիշյալ տերմինները միանշանակ չեն ընկալվում»,- ասված է կառավարության եզրակացության հիմնավորման մեջ:
