Վրաստանի խորհրդարանն առաջին ընթերցմամբ խտրականության դեմ պայքարի մասին օրենք է ընդունել: Civil Georgia-ի տեղեկությամբ՝ դրա օգտին քվեարկել է 150 պատգամավորից 110-ը:
Փաստաթուղթն արգելում է ոտնահարել մարդկանց իրավունքները նրանց ռասայական պատկանելության, ազգության, սեռի, տարիքի, քաղաքացիության, բնակության վայրի, կարողության և մի շարք այլ բնութագրերի հիմքով: Օրենքն արգելում է նաև խտրականությունը՝ ելնելով սեռական կողմնորշումից և գենդերային նույնականությունից:
Արգելքը տարածվում է ինչպես ֆիզիկական, այնպես էլ՝ իրավաբանական անձանց վրա: Այն վերաբերում է մի շարք ոլորտների, ներառյալ՝ աշխատանքի ընդունումն ու առողջապահությունը:
Օրինագծի այս տարբերակը թույլ չի տալիս օրինախախտներին տուգանքով պատժել: Որևէ մեկի իրավունքների խախտման դեպքում օմբուդսմենը պետք է նախ որպես միջնորդ հանդես գա կողմերի միջև: Չհաշտվելու դեպքում կողմերը կարող են դիմել դատարան:
Այս օրենքի ընդունումն այն պահանջներից մեկն է, որը Վրաստանը պետք է կատարի՝ ԵՄ հետ առանց վիզայի ռեժիմի հասնելու համար:
