Հայաստանի արտգործնախարար Զոհրաբ Մնացականյանը հայտարարել է, որ ՀՀ ԱԳՆ-ն ակտիվ աշխատում է Եվրոպական միության հետ վիզաների ազատականացման երկխոսության մեկնարկի ուղղությամբ. «Մեզ համար չափազանց էական, կարևոր ու սուր հարց է վիզաների ազատականացման գործընթացը: Մենք աշխատում ենք և՛ անմիջապես հանձնաժողովի, և՛ անդամ պետությունների հետ: Մենք երկկողմ մակարդակում նույնպես շատ ակտիվ աշխատում ենք, որպեսզի կարողանանք մոտեցնել այդ պահը, և ունենալ վիզաների ազատականացման երկխոսության գործընթացի մեկնարկը»։
Մնացականյանը նաև նշել է, որ երկխոսության գործընթացը դեռ ազատականացումը չէ, բայց շատ էական փուլ է այդ գործընթացն առաջ տանելու համար։
Մարդկային զարգացման միջազգային կենտրոնի նախագահ, քաղաքագետ Թևան Պողոսյանն «Առաջին լրատվական»-ի հետ զրույցում ասաց՝ վիզաների ազատականացման ծրագիրն իրենից ներկայացնում է երկու քաղաքական և մեկ տեխնիկական որոշում. «Առաջինն այն է, որ Եվրոպայի խորհուրդն ընդունում է քաղաքական որոշում՝ համաձայնվում է, հանձնարարում ԵՄ-ի հանձնաժողովին նախաձեռնել բանակցություններ ու իրականացնել տեխնիկական աջակցության ծրագրեր այդ երկրի հետ ընթանալու վիզաների ազատականացման ուղղությամբ։ Հենց այդ քաղաքական որոշումը կընդունվի ու կհանձնարարվի Եվրոպական հանձնաժողովին, Եվրոպական հանձնաժողովը կձևավորի հանձնախումբ, կասի՝ գնացեք Հայաստան ու նախաձեռնեք վիզաների ազատականացման տեխնիկական բարեփոխումների անհրաժեշտ փաթեթը»։
Պողոսյանն ընդգծեց՝ եթե դիտարկենք Վրաստանի, Ուկրաինայի, Մոլդովայի օրինակը, մոտավորապես 4 տարվա գործընթաց է. «Բայց, քանի որ մենք այսօր որոշ բաներ արել ենք, ունենք հնարավորություն, որ երբ գան մեզ տեխնիկապես գնահատեն, հնարավոր է՝ մենք 2-3 տարվա մեջ անցնենք բոլոր անհրաժեշտ բարեփոխումները։ Դրանք անցնելուց հետո հանձնաժողովը կզեկուցի Եվրոպայի խորհրդին ու կասի, որ Հայաստանը պատրաստ է։ Դրանից հետո կգա երկրորդ քաղաքական որոշումը՝ Եվրոպայի խորհուրդը պետք է ընդունի քաղաքական որոշում, ուղարկի Եվրոպայի խորհրդարան՝ խնդրելով, որ վերջնական վավերացում լինի»։
Մեր զրուցակիցը հավելեց՝ մենք կարող է ավելի շուտ սկսած լինեինք, եթե չլիներ այն փաստը, որ Մոլդովայում, Ուկրաինայում կային որոշակի չարաշահումներ. «Մարդիկ գնում էին, ժամկետներ խախտում, ինչի պատճառով Եվրամիությունում որոշակի զգուշավորություն կա։ Մենք հիմա այդ պատճառով հետ ընկած ենք. հաշվի առնենք նաև Եվրամիությունում ընտրությունները, Հայաստանում եղած ներքաղաքական գործընթացները։ Գուցե գործընթացը սկիզբ առնի, բայց որոշակի ժամանակ է պետք։ Կարևոր է, որ Հայաստանն աշխատի Եվրամիության հզոր երկրների հետ, որոնք կկարողանան այդ քաղաքական որոշումը Եվրախորհրդարանում անցկացնել»։
Մեր այն դիտարկմանը, որ եթե ԵՄ անդամ գոնե մեկ երկիր դեմ արտահայտվի՝ գործընթացը կձախողվի, Թևան Պողոսյանն արձագանքեց. «Այս ամենի մեջ հարցն այն է, թե ով ինչպես կկարողանա համոզել։ Պետք չէ մտածել, որ մի երկիր կա, որ, քաղաքական պատճառներից ելնելով, չի անի։
Դա կարող է երկու դեպքում լինել՝ կա՛մ իր շահերին դեմ է, կա՛մ ունի խնդիրներ, օրինակ՝ Գերմանիան ու Ֆրանսիան ժամանակին շատ են հայտարարել, որ Հայաստանից շատ են գնում անօրինական ճանապարհով, առաջանում են խնդիրներ, ուստի ունեին բնական մտավախություններ։
Հուսանք՝ Հայաստանի դիվանագիտությունը այդ բոլոր խնդիրները կկարողանա հաղթահարել, ռեադմիսիայի պայմանագրերը կնքված են, մեկ անգամ չէ, որ կարդացել ենք, որ ոչ լեգալ միգրանտներին հետ են ուղարկում, Հայաստանն էլ պատրաստակամ ընդունում է։ Գործընթացը հեշտ չէ, բայց անհնար էլ չէ, պետք է աշխատել»։
