«Քանի որ պայմանների փոփոխության մասին նոր հայտարարություն չի եղել, կարելի է ենթադրել, որ 102-րդ ռազմաբազայի կրկնապատկվող ծախսերը շարունակելու է վճարել հայկական կողմը, այսինքն՝ մեր ծախսը կրկնապատկվելու է»,- «Առաջին լրատվական»-ի հետ զրույցում նշեց քաղաքագետ Արա Պապյանը:
Նրա խոսքով՝ եթե դա իսկապես Հայաստանին պաշտպանող ռազմաբազա լիներ, մոտեցումը այլ կլիներ. «Բայց մենք ռուսական կողմից բազմիցս լսել ենք, որ ռուսական ռազմաբազան որևէ ներգրավվածություն չի ունենալու Արցախի հարցով Հայաստան-Ադրբեջան հակամարտության մեջ: Թուրքիայի պարագայում ևս մենք մեծ մտահոգություններ ունենք, որ այդ ռազմաբազայի միջամտությունը կարող է, այսպես ասած, երեք օր ուշանալ»:
Ինչպես նշեց քաղաքագետը՝ Սիրիայում էլ ռուսներն ունեն ռազմաբազա կամ դրա նման մի բան, որը, սակայն, չմիջամտեց Թուրքիայի դեմ հակամարտությանը, ընդհակառակը՝ թուրքերի հետ համագործակցում են. «Մենք ի՞նչ երաշխիք ունենք, որ Հայաստանում նույնը չի կրկնվի»:
Արա Պապյանը նշեց նաև, որ ցանկացած ռազմաբազա քո տարածքում ոչ թե անվտանգության բաղադրիչ է, այլ թիրախ այլ երկրների համար. «Այսինքն՝ եթե Ռուսաստանը հակամարտության մեջ մտնի որևէ այլ երկրի հետ, այդ երկրի համար Հայաստանի Հանրապետության տարածքը կդառնա թիրախ, և մենք կդառնանք ավելի խոցելի: Ես չեմ կարծում, որ մենք կարող ենք այդ ռազմաբազային թույլ տալ կամ չտալ որևէ հակամարտության մեջ ներգրավվել. այդ ռազմաբազան ամբողջովին տնօրինում են ռուսները»:
Հարցազրույցն ամբողջությամբ՝ տեսանյութում:
