Միացյալ Նահանգների Կոնգրեսի Ներկայացուցիչների պալատի կողմից Հայոց ցեղասպանությունը ճանաչող և դատապարտող բանաձևի ընդունման և Թուրքիայի արձագանքի վերաբերյալ հաղորդում է պատրաստել ռուսական НТВ հեռուստաալիքը։
Թուրքիայի ԱԳՆ-ն բանաձևի ընդունումը խայտառակություն է անվանել։ «Թուրքիան ցասման մեջ է ԱՄՆ Ներկայացուցիչների պալատի Հայոց ցեղասպանությունը ճանաչելու որոշման պատճառով։ Այդ թեման իսկական ցավ է Թուրքիայի համար, և ԱՄՆ-ի որոշումը, անկախ հարաբերություններում առկա որոշակի սառնությանը, հարված է Թուրքիայի համար»,- ասվում է հեռուստաալիքի ռեպորտաժում։
ԱՄՆ Ներկայացուցիչների պալատում բանաձևի ընդունման հարցում կոնգրեսականները գրեթե միաձայն են եղել․ այն ընդունվել է 405 կողմ, 11 դեմ ձայնով։
Ռեպորտաժում նշվում է նաև, որ Ցեղասպանությունը ճանաչող և դատապարտող փաստաթուղթը ընդունել են ԱՄՆ 50 նահանգներից 49-ը։ Իսկ կոնգրեսական Ադամ Շիֆը, որը ներկայացնում է ամենահայաշատ Կալիֆոռնիա նահանգը, քվեարկությունից հետո ելույթ ունենալով և խոսելով այն մասին, որ շուրջ 20 տարի զբաղվել է այս փաստաթղթի առաջխաղացմամբ, հազիվ է զսպել արցունքները։