Թուրքական Zaman թերթի փոխանցմամբ՝ ԵՄ-ին Թուրքիայի անդամակցության գծով գլխավոր բանագնաց, պետնախարար Էգեմեն Բաղըշը հանդիպել է ԵՄ ընդլայնման և եվրոպական հարևանության եվրակոմիսար Շտեֆան Ֆյուլեի հետ։
Հանդիպման ժամանակ կողմերը քննարկել են ԵՄ-ին Թուրքիայի լիիրավ անդամակցության, ինչպես նաև կիպրական հարցը։ Վերջինս ԵՄ-ին Թուրքիայի անդամակցության գլխավոր խոչընդոտներից մեկն է։ Բաղըշը նշել է, որ ԵՄ-ում Կիպրոսի հունական հատվածի նախագահության ժամանակաշրջանում քննարկման նոր «գլուխներ» (բաժիններ) չեն բացվի, սակայն իրենք չեն դադարեցնի բարեփոխումների իրագործումը։
Բացի այդ, Թուրքիայի արտգործնախարար Ահմեդ Դավութօղլուն Թուրքիայում գտնվող Ուկրաինայի արտգործնախարար Կոնստանտին Գրիշչենկոյի հետ համատեղ ասուլիսի ժամանակ հայտարարել է, որ եթե Կիպրոսի հունական հատվածը մինչև կիպրական խնդրի կարգավորումը (2012 թվականի հուլիսի 1-ից) ստանձնի ԵՄ նախագահությունը, ապա իրենք կսառեցնեն ԵՄ հետ հարաբերությունները։
Հիշեցնենք, որ հուլիսի 1-ից ԵՄ նախագահությունը 6 ամսով ստանձնել է Լեհաստանը, ինչը մեծ հույսեր է առաջացրել թուրքական կողմի մոտ։ Թուրքիայի հետ բարեկամական հարաբերություններ ունեցող Լեհաստանին հաջորդելու են Թուրքիայի հետ բարյացակամ հարաբերություններ չունեցող Դանիան և Կիպրոսը, ինչի պատճառով էլ Թուրքիայի համար մեծ կարևորություն է ներկայացնում Լեհաստանի նախագահության ժամկետը։
ԵՄ-ը Թուրքիայից պահանջում է իրագործել 35 «գլուխներում» նշված բարեփոխումները։ 2010 թվականի նոյեմբերի 9-ին հրապարակված ԵՄ ընդլայնման Թուրքիայի մասին 13-րդ զեկույցում նշված էր, որ Թուրքիան կատարել է այդ 35 «գլուխներից» միայն մեկը, քայլեր է ձեռնարկել 13-ի ուղղությամբ և անուշադրության է մատնել մնացած 21-ը: Վերջիններից 18-ը գտնվում են սառեցված վիճակում։
