Կոտայքի մարզի ընդհանուր իրավասության դատարանում Գեղամ Մարգարյանի նախագահությամբ ավարտվել է Իրանի քաղաքացի Մ.-ի գործի դատական քննությունը:
31-ամյա Մ.-ին մեղադրանք էր առաջադրվել տուժողի նկատմամբ բռնություն գործադրելու, նրան ծեծի ենթարկելու համար՝ ՀՀ քրեական օրենսգրքի 118 հոդվածով:
Տուժողը Մ.-ի հայազգի կինն է՝ Ա.-ն:
Ըստ մեղադրանքի՝ 2019 թվականի հունիսի 2-ի առավոտյան, ժամը 10-ն անց 30-ի սահմաններում Աբովյան քաղաքի բնակարանում նախաճաշի սեղանը հավաքելու ժամանակ կինը պատահաբար վայր է գցել դանակը, ինչից վիճաբանություն է սկսվել ամուսինների միջև, ու Մ.-ն բռունցքներով 4-5 անգամ հարվածել է կնոջ մարմնի տարբեր մասերին՝ նրա առողջությանը պատճառելով թեթև վնասի հատկանիշներ չպարունակող վնասվածքներ:
Դատարանում ամբաստանյալ Մ.-ն իրեն մեղավոր է ճանաչել:
Նա հայտնել է, որ դեպքի օրը կինը՝ Ա.-ն, նախաճաշի սեղանը հավաքելու ժամանակ վերցրել է կարագի ափսեն, դրանում եղած դանակը ընկել է իր վրա: Ինքը կնոջը հարցրել է՝ սեղանն ի՞նչ ձևի ես հավաքում: Վիճաբանություն է սկսվել իրենց միջև: Ինքը մի քանի անգամ հարվածել է կնոջը, բայց ուժեղ չի խփել. երկու անգամ հարվածել է նրա թևին, հետո էլ հրել է:
Ամբաստանյալը նշել է, որ իրենց տանը միշտ վիճաբանություններ եղել են: Վեճերը հիմնականում առաջացել են… իրար չհասկանալու արդյունքում…
Տուժող Ա.-ն դատարանում հրաժարվել է ցուցմունքներ տալուց, բայց պատասխանելով կողմերի հարցերին՝ հայտնել է, որ Մ.-ն իր ամուսինն է, սակայն իրենք առանձին են բնակվում, ինքը Մ.-ի հետ ոչ մի հարաբերություն չունի…
Դեպքի օրը տանը եղել են ինքը, ամուսինը՝ Մ.-ն, անչափահաս երեխան: Իր ու Մ.-ի միջև վիճաբանությունը շատ արագ է սկսվել այն բանից հետո, երբ ինքը ափսեն վերցրել է Մ.-ի դիմացից, ու ափսեի մեջ եղած դանակն ընկել է վերջինիս վրա:
Մ.-ն միանգամից բռնկվել է, բռունցքներով չորս-հինգ անգամ հարվածել է իրեն:
Տուժող Ա.-ն հայտնել է, որ ամուսինը՝ Մ.-ն, իրեն հաճախակի է ծեծել…
Դատաբժշկական փորձաքննության եզրակացությամբ՝ տուժող Ա.-ին բութ, կոշտ առարկաներով պատճառվել են ձախ բազկի շրջանի արյունազեղումներ, որոնք առողջության թեթև վնասի հատկանիշներ չեն պարունակում:
Դատարանը հաշվի է առել, որ ամբաստանյալ Մ.-ին բնակության վայրի համատիրության կողմից տրվել է դրական բնութագիր, համաձայն որի՝ Մ.-ն իրեն «դրսևորել է որպես պարկեշտ անձնավորություն… Տարիներ շարունակ վայելել է հարևանների վստահությունը և արժանացել է հարգանքի… Նա պարտաճանաչ ու պատասխանատու բնակիչ է…»:
Դատարանը հաշվի է առել, որ Մ.-ի խնամքին կա մեկ անչափահաս երեխա:
Ամբաստանյալ Մ.-ն մեղավոր է ճանաչվել ՀՀ քրեական օրենսգրքի 118 հոդվածով ու դատապարտվել է տուգանքի՝ 100 հազար դրամի չափով:
