Լոռու մարզի ընդհանուր իրավասության դատարանում այսօր ընթանում էր Ալավերդի քաղաքի բնակիչ Կամո Փիրուզյանի սպանության համար մեղադրվող Վահագն Աբգարյանի (Ալավերդցի Վահագ) և Վլադիմիր Դավթյանի գործով դատական նիստը։
Այն, կարծես թե, ընթանում էր շատ լարված ու սկանդալներով։ Կասեք՝ ի՞նչ էր տեղի ունենում դատական նիստի ընթացքում․ «Առաջին լրատվական»-ի հարցին իրավապաշտպան Մարինա Պողոսյանը պատասխանեց․ «Նախ նշեմ, որ մենք ի սկզբանե պատրաստ էինք, որ որոշակի պրովոկացիաներ այս դատական նիստի ընթացքում պետք է լինեին։ Դա բացատրվում է նրանով, որ ամսի 18-ին մեղադրող կողմը և տուժողի ներկայացուցիչները շատ ծանր տարան մեղադրող կողմի վկա հանդես եկող Արթուր Մնացականյանի (Արկո) հայտնվելը դատարանում, որն ինձ համար անհասկանալի էր»։
Իրավապաշտպանը նաև հավելեց․ «Այս քրեական գործում մեր կազմակերպությունը ներգրավվել է որպես մարդու խախտված իրավունքների պաշտպանության գծով։ Հարգարժան փաստաբան Երվանդ Վարոսյանը սկսել է անձնավորել ու պիտակավորել ինձ, ասելով՝ «իբրև իրավապաշտպան», ասեմ, որ այդ «իբրև իրավապաշտպանի» շնորհիվ Վահագն Հարությունյանից արդեն իսկ հինգ տուժող կա։ Այս ամենը Լուսինե Սահակյանին և Երվանդ Վարոսյանին հոգեխանգարմունքի մեջ է գցել, որովհետև, եթե մարդիկ Կամո Փիրուզյանի ներկայացուցիչներն են, ապա նրանք պետք է շահագրգռված լինեն, որ արդար դատաքննություն գնար»։
